३० क्युफिट काठसहित एकजना पक्राउ

१४ माघ, घोराही । दाङमा प्रहरीले अवैध चिरान काठ सहित एकजनालाई पक्राउ गरेको छ ।

पश्चिम दाङको शान्तिनगरबाट रा १ ज ५१ नम्बरको जिपमा राखेर बाघमारे तर्फ ल्याइँदै गरेको ३० दशमलव ११ क्युफिट सालको काठसहित बाघमारे ७ का चित्रबहादुर केसीलाई प्रहरीले पक्रेको हो ।

शान्तिनगरको चिराघाट नजिकैबाट मंगलबार राती साढे १ बजे काठ बरामद गरेको इलाका प्रहरी कार्यालय तुलसिपुरका प्रमुख डिएसपी चक्रराज जोशीले जानकारी दिए । जिप चालक सहित दुईजना भने फरार रहेको डिएसपी जोशीले बताए ।

काठ, जिप र केसीलाई आवश्यक कारवाहीका लागि धनौरी वन सेक्टरलाई जिम्मा लगाइएको छ ।