साना उद्योगको प्रवर्द्घन सरकारको प्राथमिकता : उद्योगमन्त्री भट्ट

१६ मंसिर, काठमाडौं । उद्योग वाणिज्य तथा आपूर्तिमन्त्री लेखराज भट्टले आर्थिक विकासका आधार लघु, घरेलु तथा साना उद्योगहरुको प्रबर्धन र विकासमा सरकार दृढ भएर लाग्ने बताएका छन् । उद्यमीहरुको समस्या समाधान गर्न आफू सँधै तत्पर रहने प्रतिवद्धता पनि उनले व्यक्त गरे ।

नेपाल घरेलु तथा साना उद्योग महासंघ र विभिन्न बस्तुगत संघहरुसँग मन्त्रालयमा आयोजित अन्तरक्रिया कार्यक्रममा मन्त्री भट्टले यस्तो बताएका हुन् ।

उद्योग मन्त्रालयसँग लघु, घरेलु तथा साना उद्योगहरुको प्रत्यक्ष सम्बन्ध रहेको बताउँदै उनले भने- ‘तपाईंहरुको सफलतासँगै मेरो सफलता पनि जोडिएको छ, मेरो सफलतासँग तपाइहरुको सफलता पनि जोडिएको छ ।’

समस्याका साथै समाधानका उपाय पनि ल्याउन व्यवसायीलाई मन्त्री भट्टले आग्रह गरे ।

उनले भने- ‘साना उद्योगहरु कसरी बाँचेका छन, समग्रमा साना व्यवसायीका समस्या के के छन पहिचान गरेर वैज्ञानिक र वस्तुवादी भएर ल्याउनुस् । अनि छलफल गरौं, निकास ननिस्कने कुरै छैन ।’

महासंघका अध्यक्ष श्यामप्रसाद गिरीले लघु घरेलु तथा साना उद्योगले झेलिरहेका समस्या सुनाएका थिए ।

‘अघिल्लो पुस्ताले गरिरहेको काम पछिल्लो पुस्ताले गरिरहेको छैन यो नेपालको लागि ठूलो चुनौतीको विषय बनेको छ,’ गिरीले भने, ‘अहिलेे जसरी उद्योग चलाइरहेका छौं ती उद्योगहरु व्यवस्थित छैनन् ।’