७ पुस, काठमाडौं । संविधानसभाको यो दृश्य हेर्दा जोसुकैलाई लाग्न सक्छ, बैठक सुरु हुन निकै समय बाँकी छ र केही सभासद छिट्टै आइपुग्नेछन् ।
तर, कुरो बेग्लै छ । आइतबार दृश्य कैद गरिरहँदा संविधानसभामा संवैधानिक राजनीतिक सम्वाद समितिको प्रतिवेदनमाथि छलफल भइरहँदाको थियो ।
संविधान बनाउने समयसीमा सकिनै लागेका बेला महत्वपूर्ण विषयमा भइरहेको छलफलमा प्रमुख दलका शीर्षनेताहरुको मात्रै होइन, अधिकांश सभासदका कुर्सी खाली देखिए ।
भित्र बैठक चलिरहेको थियो, बाहिर सभासदहरु घाम तापिरहेका थिए । संविधानसभामा भेटिएका सीमित सभासद पनि मोबाइल खेलाइरहेका थिए ।
संविधान बनाउने बेलामा सभासदहरु कहाँ के गर्दैछन् भनेर खोज्नुपर्ने अवस्था छ । बैठक सुरु हुँदा आवश्यक गणपूरक संख्या पुगे पनि सभासदहरुले प्रतिवेदनमाथि बोल्ने क्रम सुरु भएपछि सभासदहरुको हाटा गर्ने (हाजिर गर्ने र टाप ठोक्ने) क्रम सुरु हुन्छ ।
आइतबार धेरै सभासदहरु हाजिर गरेर बाटो लागिसकेका भेटिए भने बोल्ने पालो पर्खिरहेका सहितका केही सभासद बाहिर चौरमा पारिलो घाम तापेर गफिइरहेका भेटिए ।
‘हाजिर त अधिकांशकै हुन्छ । तर, बोल्ने क्रम सुरु भएपछि कुर्सी खाली हुन्छन्’ संसद सचिवालयका एक अधिकारीले भने-भित्रभन्दा बाहिर घाममा बढी देखिन्छन् ।’
बैठकमा सभासदहरुको उपस्थिति निकै कम भएपछि संविधानसभाका अध्यक्ष सुवास नेम्वाङले धेरै सभासद भएका कांग्रेस, एमाले, एमाओवादी र राप्रपा नेपालका प्रमुख सचेतकलाई पटक-पटक ध्यानाकर्षण गराएका छन् । तर, अहिलेसम्म सुनुवाइ भएको देखिँदैन ।
यसबारे सोध्दा एमाले प्रमुख सचेतक अग्नि खरेलले अनलाइनखबरसँग भने-‘हामीले पनि महसुस गरेका छौं । बिहान समितिहरुको बैठक चलिरहेको छ । यसले बोल्ने बोलेर जाने र आउने क्रम चलिरहेको हो । त्यसैले आजबाट बैठक १ बजे राखिएको छ ।’
थप तस्वीर हेर्नुहोस्
तस्वीरः विकास श्रेष्ठ/अनलाइनखबर