सलमान खान
१६ चैत, भैरहवा । एकीकृत नेकपा माओवादी नेतृत्वको ३० दलीय मोर्चाले आह्वान गरेको भैरहवा बन्दको सामान्य प्रभाव परेको छ । बजार, पसल, बैंक तथा वित्तीय संस्थाहरु अधिकांश बन्द छन् ।
सवारी साधन सन्चालनमा भने रोक नलगाइएकोले निर्वाध सन्चालन भैरहेका छन् । बन्द आह्वानकर्ता सडकमा खासै देखिएका छैनन् ।
आइतबारको लाठी जुलुसमा प्रहरीले हस्तक्षेप गरेको विरोधमा मोर्चाले सोमबार एक दिनका लागि बन्द आह्वान गरेको थियो । लाठी जुलुसमा प्रहरीले हस्तक्षेप गर्दा करिब १५ जना घाइते भएका थिए ।
मोर्चाको पूर्व घोषित कार्यक्रम अनुसार जिल्ला प्रशासन लगायत केही सरकारी कार्यालयहरु पनि घेराउ गरिएको मोर्चामा आबद्ध तराई मधेश लोकतान्त्रिक पार्टीका रुपन्देही जिल्ला अध्यक्ष अजय वर्माले बताए ।
भैरहवामा बिहानैदेखि पानी परिरहेकोले मोर्चाको कार्यक्रम प्रभावित भएको थियो । रुपन्देही प्रशासनले भने अपि्रय घटना हुन नदिन सरकारी कार्यालयहरुमा सुरक्षा व्यवस्था कडा बनाएको छ ।
