६ भदौ, काठमाडौं । आदिवासी जनजातिले आयोजना गरेको नेपाल बन्दको प्रभाव राजधानीमा नपरेपछि बन्दकर्ताहरु निराश देखएका छन् ।
बन्द आयोजक आदिवासी जनजाति महासंघका महासचिव पेम्बा भोटेले आफूहरुले आहृवान गरेको बन्द खुलाउन राज्यपक्षबाट ‘कफ्र्यू’ लगाइएको आरोप लगाए ।
जनजाति महासंघले आइतबार र सोमबार नेपाल बन्दको आहृवान गरेको छ । काठमाडौं उपत्यकामा विहान केहीबेर बन्दको प्रभाव देखिए पनि दिउँसोबाट सार्वसाधारणले स्वस्फूर्त बन्दको उल्लंघन गरेका छन् । उपत्यकामा सवारी साधन गुडेका छन् भने बजार तथा पसल पनि खुलेका छन् ।
बन्द उल्लंघन भयो अब फिर्ता लिने हो भन्ने प्रश्नमा सभासद समेत रहेका महासचिव भोटेले भने-‘यो हाम्रो मागसँग जोडिएको बन्द हो, कुनै हालतमा फिर्ता हुँदैन ।’
उनका अनुसार उपत्यकाबाट मात्र ३२१ जना बन्दकर्ता पक्राउ परिसकेका छन् । प्रहरीको घेराभित्र बन्द उल्लंघन गरिएको भन्दै उनले भने- ‘बन्द खुलाउन कफ्र्यू लगाइएको छ । सडकमा आयो कि समातेर लैजाने गरेको छ ।’
जनजाति महासंघका महासचिव भोटेले भोलिको बन्दमा सभासदहरु नै सडकमा आउने बताए ।