२१ असोज, सिलिगुडी । भारतको सिलिगुडी नगरपालिकापछि स्थानीय ग्राम पञ्चायत चुनावमा वामपन्थीहरुले जीत हात पारेका छन् । चुनावमा प्रधानमन्त्री नरेन्द्र मोदीको बीजेपी पार्टी र पश्चिम बंगालको सत्तारुढ दल तृणमूल कांग्रेसले धक्का खाएको छ ।
विजयपछि खुसीयाली मनाउँदै वाममोर्चाका कार्यकता : तस्वीर स्रोत-हिमालय दर्पण
कुल २२ ग्राम पञ्चायतमध्ये १० वटामा वाममोर्चाले एक्लै जीत हात पारेको छ भने ८ वटामा मिलिजिुली परिणाम आएको छ । ममता बेनर्जीको त्रिणमूल कांग्रेसले ४ वटा ग्राम पञ्चायतमा मात्रै जितेको छ ।
भारतको पश्चिम बंगालबाट कम्युनिष्टहरु हारेको चर्चा गर्नेहरुलाई अहिलेको चुनावले जवाफ दिएको वाममोर्चाका नेताले बताएका छन् ।
सिलगुडी नगरपालिका र महकुमा परिषदको चुनावमा समेत वामपन्थीले बहुमत हासिल गरेका छन् । खोरीबारीजस्तो तृणमूलको प्रभाव रहेको क्षेत्रमा समेत वाममोर्चाले जितेको छ ।
मार्क्सवादी कम्युनिष्ट पार्टी छाडेर तृणमूलमा लागेकी ज्योती तिर्की पञ्चायत समितिको चुनावमै हारेकी छिन् ।
स्थानीय चुनावको परिणामपछि तृणमूल कांग्रेस र बीजेपीका जिल्ला नेताहरुमा निराशा छाएको छ भने वामपन्थीहरु उत्साहित देखिएका छन् । केही स्थानमा माकपा र राष्ट्रिय कांग्रेसवीच तालमेल भएकाे थियाे ।
स्थानीय चुनावको यो परिणामले पश्चिम बंगालको आगामी विधानसभा चुनावबाट वाममोर्चा सत्तामा पुनस्थापित हुने धेरैले अनुमान लगाउन थालेका छन् ।
स्थानीय ग्राम पञ्चायत एवं पञ्चायत समितिहरुमा चुनावमा कांग्रेसले ६१ सीट जितेको छ भने बीजेपीले २२ सीटमात्रै हात पारेको छ । तृणमूल कांग्रेसले १५३ सीट हात पारेको छ ।
गत साल सम्पन्न भारतीय लोकसभाको चुनावमा बिहार र पश्चिम बंगालमा सम्मानजनक स्थान पाएको भारतीय जनता पार्टीको प्रभाव खस्किएको रुपमा यो चुनावलाई भारतीयहरुले विश्लेषण गरेका छन् ।
बीजेपीले पाएन नेपालीको भोट
विगतमा बीजेपीले नेपाली भाषीहरुको भोट पाउने गरेकोमा यसपालि नक्सलवाडीलगायतका स्थानमा रहेका नेपालीभाषी मतदाताले वाममोर्चालाई सघाएको चर्चा छ ।
भारतको सिलिगुडी एवं नक्सलवाडीलगायतका स्थानमा नेपाली मूलका भारतीयहरुको उपस्थिति रहेको छ ।
भारतीय प्रधानमन्त्रीले नेपालमाथि नाकाबन्दी लगाएकाले नेपालीभाषीहरु विजेपीबाट विकषिर्त भएको कतिपयको अनुमान छ । पश्चिम बंगालमा बसोबास गर्ने नेपाली भाषीको नाता सम्बन्ध र बिहाबारी झापा र मोरङका नेपालीहरुसँग हुने भएकाले यो रोटी बेटीको नाताका कारण मोदीको नेपाल नीतिले उनीहरुमा प्रभाव पारेको बताइन्छ ।
बिहारमा बीजेपी हार्छ : येचुरी
यसैवीच मार्क्सवादी कम्युनिष्ट पार्टीका महासचिव सीताराम येचुरीले आसन्न बिहारको चुनावमा समेत बीजेपीले धक्का खाने बताएका छन् ।
आरएसएस प्रमुख मोहन भागवतले दलितहरुले पाउँदै आएको आरक्षणको विरोध गरेका कारण बिहारमा बीजेपीलाई झड्का लाग्ने येचुरीले भारतीय सञ्चारमाध्यमलाई बताएका छन् । बीजेपीले आरएसएसमार्फत हिन्दुराष्ट्र बनाउने अभियान चलाएको र दादरीमा भएको हत्याकाण्ड यसैको प्रमाण भएको उनको आरोप छ ।
