१२ असार, काठमाडौं । भूकम्पबाट क्षति भएको आवास निर्माणका लागि अनुदान रकम दिने काममा ढिलाई भएको भन्दै स्थानीय विकास मन्त्रालयले भूकम्पबाट प्रभावित १० जिल्लाका गाविस सचिवहरुलाई सचेत गराएको छ ।
यसअघि स्थानीय विकास मन्त्रालयले अनुदान वितरणलाई तिव्र पार्न असार ३ गते गाविस सचिवहरुलाई निर्देशन दिएको थियो ।
आइतबार पुनः परिपत्र गर्दै मन्त्रालयले असार ३ को पत्रानुसार अनुदान रकम वितरणले किन गति लिन सकेन भनी राजधानी बाहेक १० जिल्लाका गाविस सचिवहरुलाई सचेत गराएको हो ।
यस्तै मन्त्रालयले पुनर्निर्माण प्राधिकरणसँग सम्झौता भएका बैंक तथा वित्तीय संस्थाहरुसँग सम्पर्क गरी आवश्यक समन्वय गरेर अनुदान वितरण तिव्र पार्न पुनः निर्देशन दिएको छ ।
