तिहारको योबेला मखमली, सयपत्री र गोदावरी फूलले वातावरण सुसज्जित भएको छ । तिहारको भाइटीकामा खासगरी मखमली फूल विशेष प्रयोगमा आउँछ । तिहारमा सप्तरंगी टीकाजस्तै यसको पनि विशेष महत्व हुन्छ ।
भाइटीकामा दिदीबहिनीले दाजुभाइको लामो आयुको कामना गर्दै मखमलीको माला लगाइदिन्छन् । कहिल्यै नओइलाउने भएकाले यसलाई स्वस्थ जीवन र दीर्घायुको प्रतीक मानिन्छ ।
मखमली फूल सेतो, हल्का रातो र गाढा कलेजी रङमा फुल्छ । संस्कृतमा यसलाई रक्त मल्लिका भनिन्छ ।
अहिले बजारमा ३५ रुपैयाँदेखि एक सय रुपैयाँसम्म तिरेपछि मखमली फूलको माला पाइन्छ । यो फूलको खेती काठमाडौं उपत्यकामा भक्तपुरको गुण्डु लगायतका ठाउँमा गरिन्छ ।
