१४ भदौ, काठमाडौं । न्याय परिषद् र न्याय सेवा आयोगले २४० निर्वाचन क्षेत्रमा निर्वाचन गराउन मुख्य निर्वाचन अधिकृत र निर्वाचन अधिकृत गरी २ सय ५० जनालाई खटाउन कायम मुकायम प्रधानन्यायाधीश समक्ष सिफारिस गरेको छ ।
निर्वाचन आयोगको माग बमोजिम न्याय परिषद्ले ७५ जिल्लाका मुख्य निर्वाचन अधिकृतका लागि ७५ जना मुख्य न्यायाधीश, ८६ जना सम्बन्धित जिल्ला अदालतमा कार्यरत न्यायाधीश तथा कानुन, न्याय र सरकारी सेवामा रहेका ७९ जना राजपत्राङ्कित द्वितीय श्रेणीका अधिकृतलाई निर्वाचन अधिकृतमा पठाउन सिफारिस गरिएको परिषद्का निमित्त सचिव कृष्ण गिरीले जानकारी दिनुभयो ।
उहाँका अनुसार न्याय सेवा आयोगले तथा कानुन, न्याय र सरकारी सेवामा रहेका १० जना राजपत्राङ्कित द्वितीय श्रेणीका अधिकृतलाई जगेडामा राख्नका लागि पनि सिफारिस गरेको छ । रासस