हिउँदभरि सडकमा धुलोको सास्ती खेपेका राजधानीवासीका लागि झरी पर्न थालेपछि अब जुत्ता फुकालेर हिँड्नुपर्ने स्थिति आएको छ । वर्षायाम सुरु भएपछि सामान्य पानी पर्दा पनि राजधानीबासीलाई सडकमा निस्कन महाभारतको युद्ध लडेसरह हुन थालेको छ ।
अव्यवस्थित शहरीकरण र ढलको सही निकास नहुँदा काठमाडौं उपत्यकामा पानी पर्दा सडक आहाल वा खहरे खोलोमा परिणत हुने गरेको छ । सोमबार दिउँसो पानी परेपछि ललितपुरको मंगलबजारको हालत धान रोप्न तयार पारेको खेत यस्तै बन्यो ।
मंगलबजारमा रहको ढुंगेधारा तालमा परिणत भएपछि गृहिणीहरुले धारामा पानी भर्नसमेत नसक्ने स्थिति आयो । सडकमा सवारी चालकहरुले जल यातायात चलाएजस्तै दृश्य देखिन्थ्यो । सडकमै खोलो दौडिएपछि वयस्कलाई भन्दा बढी विद्यालयबाट घर र्फकने वालवालिकालाई बढी सकस परेको थियो ।
विदेशी पर्यटकहरु पहिलोचोटि ओर्लने राजधानीकै हालत यस्तो छ भने नेपालको अन्य शहर र गाउँमा राज्यले गरेको विकासको अवस्था कस्तो होला ? देशको बजेट राजधानीमा खन्याएर प्रत्येक वर्ष ठेकेदारले सडक पीच गर्नेदेखि ढल बनाउने कार्य गरिरहेका देखिए पनि राजधानीको सडकले सरकारलाई यसरी गिज्याइरहेको छ :
तस्वीरः अजय महर्जन /अनलाइनखबर