२५ साउन, काठमाडौँ । नेपाली काँग्रेसका केन्द्रीय सदस्य अर्जुननरसिंह केसीले अहिलेको मूख्य काम संविधान लेखन भएको भन्दै सरकार परिवर्तनको कुरा बेमौसमको बाजा भएको बताएका छन् । उनले सरकारले सोचे अनुरुपको काम गर्न नसकेपछि सरकार परिवर्तनको खेलमा लाग्दा संविधान लेखनमा अवरोध उत्पन्न हुने भएकाले कोही पनि त्यसतर्फ लाग्न नहुने बताएका हुन् ।
रिपोर्टर्स क्लब नेपालले आइतबार राजधानीमा आयोजना गरेको कार्यक्रममा केसीले भने,’सरकारले सोचेअनुरुपको काम गरेको छैन् । मन्त्रीहरुले राम्रो काम गर्न सकेका छैनन् । उहाँहरुले स्वेच्छाचारी ढंगले काम गरेकोले त हामीले खुलेरै आलोचना गरेका छौँ । ‘ केसीले संविधान जारी नभएसम्म सरकारको विकल्प खोज्न नहुने बताए ।
यद्धपी केसीले काँग्रेसले एमालेसँग राष्ट्रपति, उपराष्ट्रपतिको संसदबाट अनुमोदन गर्ने भनेर नै ७ बुँदे सहमति गरेको बताउँदै सत्तारुढ दल एमालेसँग देखिएको विवाद जसरी पनि मिलाएर सहमतीका साथ सहकार्य गर्नुपर्ने बताए । उनले भने-त्यतिखेर सम्झौता गर्नु नै गलत थियो, अब ७ बुँदे सहमति कार्यन्वयन गरेर जानुको विकल्प छैन् ।
केसीले पार्टी सभापति सुशील कोइरालाले ७ महिनादेखि केन्दि्रय कार्यसमितिको बैठक नबोलाएकोमा आपत्ति प्रकट गरे । केसीले पार्टी सभापतिले प्रधानमन्त्री बन्नु अगाडी केवल औपचारिकताका लागि मात्रै केन्दि्रय समितिको बैठक राखेको र ७ महिना वितिसक्दा पनि कार्यसमितिको बैठक नबोलाएर प्रजातन्त्रिक प्रक्रियामा पार्टीलाई अगाडी नबढाएकोमा रोष व्यक्त गरे ।
कार्यक्रममा राष्ट्रिय प्रजातन्त्र पार्टीका अध्यक्ष पशुपति शमशेर राणाले पनि संविधान जारी नहुन्जेलसम्म सरकार परिवर्तनको कुरा गर्नु उचित नहुने बताए । राणाले आफ्नो पार्टी पनि सरकारमा सहभागी भएकोले अहिले नै गठबन्धन तोड्ने पक्षमा नलागेकोे प्रष्ट पारेका छन् । उनले समयमै संविधान जारी गर्नु नै अहिलेको मूख्य दायित्व रहेकोले पनि सरकार परिवर्तनको खेलमा कोही पनि लाग्नु नहुने बताएका हुन् ।
यद्धपी राणाले सरकारको कामकारवाही भने सन्तोषजनक नभएको स्पष्ट पारेका छन् । उनले भने,’अहिलेसम्म २६ जना सभासदको मनोनयन हुन सकेको छैन्, राजदूतहरुको नियुक्ति गर्न सकेको छैन् । त्यसैले सरकार जुन ढंगले चल्नुपर्ने थियो त्यो ढंगले चल्न सकेको छैन् । आगामी दिनमा सरकारले अझै गति बढाउनुपर्छ । ‘
