३१ साउन, काठमाडौं । एमालेको केन्द्रीय कमिटी बैठक जुन एजेण्डाका लागि बोलाइएको थियो, त्यसमा प्रवेश नै नगरी टुंगिएको छ ।
पोलिटब्यूरो र स्थायी कमिटी गठन तथा नेताहरुको बरियता निर्धारणको एजेण्डामा बसेको बैठकमा जति छलफल गरे पनि विवाद नमिलेपछि पछि गर्ने गरी बैठक समापन गरिएको हो ।
बिधानको धारा ३८ अनुसार पोलिटब्यूरो सदस्यको चुनावमा एक पटक केन्द्रीय सदस्य भइसकेकाले मात्र उम्मेदवार बन्ने कि नयाँले पनि पाउने भन्नेमा सदस्यहरु विभाजित भएपछि मूल एजेण्डामा प्रवेश नै नभएको स्रोतले जनाएको छ ।
बैठकले विधानका सम्बन्धमा पार्टी पदाधिकारी तथा बरिष्ठ नेताहरुसँग परामर्श गरी यथाशीघ्र सहमति कायम गरी विधान प्रकाशित गर्ने निर्णय गरेको महासचिव ईश्वर पोखरेलले जानकारी दिए ।
पोलिटब्यूरो र स्थायी समिति चुनाव हुन नसकेपछि नेताहरुको कार्यविभाजन पनि रोकिएको छ । तत्कालका लागि केन्द्रीय सदस्यहरुले यसअघि सम्हाल्दै आएको जिम्मेवारी सम्हाल्ने, भूगोलबाट निर्वाचित सदस्यले भूगोलको जिम्मेवारी लिने र बाँकी जिम्मेवारीको हकमा सचिवालयले निर्णय गर्ने महासचिव पोखरेलले बताए ।
