२१ कात्तिक, काठमाडौं । काठमाण्डौ यतिबेला सार्कमय छ । सार्ककै लागि बाटोघाटो बनाउने र रंगरोगन गर्ने काम भइरहेको छ भने सुरक्षा निकाय सुरक्षाको खाका बनाउँदै छन् ।
यतिबेला ट्राफिक प्रहरीलाई भने अंग्रेजी सिक्ने चटारो छ ।
सार्कमा सवारी ब्यबस्थापनमा खटिने ट्राफिक प्रहरीले अंग्रेजी भाषा अध्ययन थालेका छन् । ट्राफिक प्रहरी प्रवक्ता वसन्त पन्तले भने-‘पर्यटकहरु आउने क्षेत्रमा काम गरिरहेकाहरुलाई भाषा सिकाउन लागिएको हो ।’
महिला र पुरुष गरी १८ जना ट्राफिकले काठमाण्डौंको अर्बिट इन्टरनेशनलमा सोमबारदेखि अंग्रेजी सिक्न थालेका छन् ।
अर्बिटका शैक्षिक विभाग प्रमुख राधेश्याम मल्लले अनलाइनखबरसँग भने-‘खासगरी सार्कलाई केन्द्रमा राखेर कक्षा सुरु गरेका हौं । यसमा विदेशी पर्यटक आउँदा कसरी कुराकानी गर्ने भनेर सिकाइरहेका छौं ।’
उनका अनुसार पर्यटकहरुले सहयोग माग्दा विभिन्न स्थानको बाटो कसरी बताउनेदेखि उनीहरुसँग कसरी कुराकानी गर्ने भनेर सिकाइएको छ ।
सोमबार उनीहरुले व्यक्तित्व विकास अन्तर्गत पर्यटकसँग कसरी हात मिलाउने, कसरी भेट्ने जस्ता कुरा सिकेका छन् ।
दिनहुँ एक घण्टाका दरले ८ दिनसम्म भाषा कक्षा संचालन हुने छ । कक्षामा दुई असइसहित १८ जना छन् ।
