श्रीधर पौडेल
२२ वैशाख, काठमाडौं । बालाजुबाट झण्डै ४ किलोमिटर टाढा पर्ने धर्मस्थलीमा भूकम्पले ९० प्रतिशत घर क्षतिग्रस्त भएका छन् । २४ जनाको ज्यान गुमेको छ ।
भूकम्पपीडितहरु खेतमा त्रिपाल टाँगेर बसेका छन् । अब उनीहरु साढे २ तला भन्दा अग्ला घर नबनाउने निष्कर्षमा पुगेका छन् । सो क्षेत्रमा साढे २ तलाभन्दा अग्ला अधिकांश घर भत्किएर खण्डहर भएका छन् । अनलाइनखबरकर्मी धर्मस्थली पुग्दा स्थानीय भग्नावशेष पन्छाउन व्यस्त थिए ।
‘राहत होइन, चर्पि देऊ’
राजधानीबाट नजिकै भए पनि भूकम्प गएको २-३ दिनसम्म सरकारले राहत पुर्याउन सकेन । व्यक्तिगत पहल र सामाजिक संघ संस्थाले उनीहरुलाई सहयोग गरे । अहिले राहत पुगिरहेकाले दुई छाक खानलाई खासै दुःख छैन तर अहिले सबैभन्दा धेरै आवश्यकता सरसफाइको छ ।
‘अब राहत भन्दा पनि अहिले हामीलाई सेनेटरीका चिजहरु आवश्यक छ जस्तो की ब्रसहरु, साबुनहरु, बकेटहरु र मुख्य गरी ट्वाइलेटको,’ धर्मस्थली २ का स्थानीय राजेन्द्र श्रेष्ठले भने ।
भिडियो हेर्नुहोस् –
धर्मस्थलीका भूकम्पपीडितहरुका लागि केही व्यक्ति र सामाजिक संघ संस्थाहरुले दुईवटा अस्थायी चर्पि बनाइदिएका छन् ।
श्रेष्ठले स्वदेश विदेशबाट राहत सामाग्री आएकोमा खुसी व्यक्त गरे । तर, धर्मस्थली २ को नजिकैका अरु गाउँमा भने राहत पुगेको थिएन । श्रेष्ठले छिमेकी गाउँको दुःख देख्न सकेनन् र आफ्नो गाउँमा आएका केही खाद्यान्न र राहत सामग्री व्यक्तिगत पहलमा वरपरका गाउँमा पनि पुर्याइदिए ।
उनले भने, ‘वरपरका कुनै पनि गाउँमा राहत पुगेको थिएन । उनीहरु पनि हामीजस्तै विपदमा छन् त्यसैले यहाँ आएको राहत तथा अन्य मेडिकल टिमलाई मैले त्यतातिर पठाइदिएँ ।’