६ जेठ, काठमाडौं । भूकम्पका कारण अबरुद्ध सिन्धुपाल्चोक तातोपानी सडकखण्ड बुधबार दिउँसोदेखि खुलेको छ । चिनियाँ उद्धार टोलीले बाटोमा खसेको पहिरो पन्छाएर गाडी चल्नसक्ने बनाएको छ ।
‘बाटो खुलेर दुईतर्फी गाडीहरु चल्न थालिसकेका छन्,’ नेपाल चेम्बर अफ कमर्स तातोपानीका पूर्वअध्यक्ष जाङ्बु शेर्पाले अनलाइनखबरसँग भने, ‘तर, पहिरो खस्ने क्रम नरोकिएकोले जोखिम भने कायमै छ ।’
भूकम्पले पहाडी भूबनोट कमजोर रहेकाले पहिरो र ढुंगा खस्ने क्रम रोकिएको छैन । तर चिनियाँ टोलीले डोजर लगायतका साधन प्रयोग गरी बाटो खुलाउने काम गर्दै आएको छ ।
नेपालको तातोपानी भन्सारमा रोकिएका केही कन्टेनर र गाडीहरु बुधबार काठमाडौंतर्फ आएका छन् ।
शेर्पाले बाटो खुले पनि नेपाल-चाइना ब्यापार सुचारु हुन भने अझै केही समय लाग्नसक्ने बताए । तातोपानी नेपाल र चीनको प्रमुख ब्यापारिक केन्द्र हो ।
उनले भने, ‘नेपालतर्फ बाटो क्लियर भए पनि चाइनातर्फ अझै क्लीयर हुने छाँट छैन, पहिलेको जस्तै ब्यापार सुरु हुन त कम्तिमा ३ महिना जति लाग्ला ।’