श्रीधर पौडेल
६ असार, काठमाडौं । मुख्यसचिव लीलामणि पौडेलले योगसम्बन्धी तालिमका लागि आगामी बजेटमा आवश्यक रकमको व्यवस्था गरिनुपर्ने बताएका छन् ।
पहिलो अन्तराष्ट्रिय योग दिवसको अवसरमा आइतबार विहान स्वास्थ्य मन्त्रालयले आयोजना गरेको कार्यक्रममा मुख्य सचिव पौडेलले यस्तो बताएका हुन् । कार्यक्रममा मुख्य सचिव पौडेलले योगसम्बन्धी अनुसन्धान र तालिम दिन स्वतन्त्र संस्था आवश्यक रहेको भन्दै त्यसका लागि आगामी बजेटमा कार्यक्रम ल्याउन मन्त्रालयका अधिकारीलाई निर्देशन दिए ।
यसैबीच पहिलो योग दिवसका अवसरमा काठमाडौंको लैनचौरस्थित भारतीय दुतावासको कार्यालय परिसरमा योगशिविर आयोजना गरियो । सो शिविरको उपराष्ट्रपति परमानन्द झाले उदघाटन गरे ।
दूतावासमा आयोजित कार्यक्रममा उपराष्ट्रपति झासहित नेपालका लागि भारतीय राजदूत रन्जित रे, कलाकारहरु मदनकृष्ण श्रेष्ठ, हरिवंश आचार्य, अभिनेतृ मनिषा कोइराला एवं उद्योगी व्यवसायीसमेत सहभागी थिए ।
भारतीय प्रधानमन्त्री नरेन्द्र मोदीले संयुक्त राष्ट्रसंघको ६९ औं साधारणसभामा योगको उदगमस्थल नेपाल र भारत भएको बताउँदै योग दिवस मनाउने प्रस्ताव पेश गरेका थिए । सो प्रस्तावलाई राष्ट्रसंघले गत वर्षको सेप्टेम्बर ११ मा पारित गरेको थियो । विश्वका १ सय ७० भन्दा बढी देशले यसमा समर्थन जनाएका थिए ।
संयुक्त राष्ट्रसंघको आह्वानमा हरेक वर्ष जुन २१ मा अन्तरराष्ट्रिय योग दिवस मनाइनेछ । नेपालले भने यसअघि नै प्रत्येक वर्ष पुस १३ गते राष्ट्रिय योग दिवस मनाउने घोषणा गरिसकेको थियो ।
भारतीय दुतावासमा आयोजित योग शिविरका तस्वीर हेर्नुस्-
