भोली असार १५ । कृषीप्रधान देश नेपालमा अब धान रोपाइँको सुरुवात हुँदैछ । असार १५ बाट त देशभर धान रोपाइँ धमाधम सुरु हुन्छ । धान रोपाइँको रमाइलो नै बेग्लै छ । बर्षभरी खानका लागि किसानले दुख गरेर धान रोप्छन् । अर्कोतिर, असार १५ मा दही चिउरा खाने प्रचलन पनि छ ।
कृषी पेशामा लागेकी नायिका विनिता बराललाई पनि धान रोप्ने चटारो छ । विनिताले टोखामा लिएको जग्गामा यसपटक धान नै रोप्ने तयारी गरिएको छ । भूकम्प पीडितहरु बसेपछि उनको तरकारी खेती यसपटक भएन । जसकाकारण यो बर्ष धान रोपाइँको तयारी गरेको उनले बताइन् ।
चितवन घर भएकाले पनि विनिता धान रोपाइँबाट टाढा छैनन् । धान र तोरीका लागि प्रख्यात मानिएको चितवनमा उनले सानैबाट हिलोमा रमाइलो गरेकी छिन् । उनलाई विशेषगरि धान रोपाइँको समयमा खाइने खाजा मनपर्छ । दही चिउरा, केराउ र आलुको तरकारी विनिताका लागि विशेष छ । बाउँसेहरुले गीत गाउँदै गर्दा हिलो खेल्न पनि उनलाई खुबै मनपर्ने रहेछ ।
अर्की नायिका पवित्रा आचार्यसँग मिलेर विनिताले असार १५ अगाडि नै खेत रोपाइँको अनुभव लिइन् । सुलोक निरञ्जनले खिचेका तस्बिरमा पवित्रा र विनिताले धान रोपाइँको अनुभव लिएका हुन् ।
दुबै कलाकारले तस्बिरका लागि भएपनि धान रोप्दा रमाइलो अनुभव भएको सुनाए । 
