२५ साउन, काठमाडौं । वरिष्ठ राजनीतिज्ञ राजेश्वर देवकोटाको ८६ बर्षको उमेरमा निधन भएको छ । बाँसबारीस्थित न्यूरो अस्पतालमा उपचार गर्दा गर्दै सोमबार विहान देवकोटाको निधन भएको हो ।
उनी पछिल्लो समय निमोनियाबाट पीडित थिए ।
उनको पार्थिव शरिरलाई विहान ११ बजे प्रज्ञाभवन कमलादीमा श्रद्धाञ्जलीका लागि राखेर पशुपतिस्थित आर्यघाटमा लगेर अन्त्येष्टि गरिएको छ । छोरा इश्वर देवकोटाले उनलाई दागबत्ती दिएका थिए ।
देवकोटालाई श्रद्धाञ्जली दिन सभामुख सुवास नेम्वाङसहित बिभिन्न दलका नेताहरू प्रज्ञा भवन पुगेका थिए ।
(गणतन्त्रवादी र राजावादी नेताले दिए राजेश्वर देवकोटालाई श्रद्धाञ्जली)
गोर्खामा जन्मिएका देवकोटा तीनपटक राष्ट्रिय पञ्चायतको अध्यक्ष बनेका थिए । उनी २०१९ सालमा शिक्षा मन्त्री र २०२२ सालमा भूमिसुधार सहायक मन्त्री समेत बने ।
२००७ को जयतु सँस्कृतम् आन्दोलनको उनी एक योद्धा समेत हुन् । वीपी कोइरालासँगै कांग्रेसको संस्थापक सदस्य बनेका उनी पछि विपिसँग मत नमिलेपछि पार्टी परित्याग गरेर पञ्चायतको समर्थनमा लागेका थिए ।
राष्ट्रिय प्रजातन्त्र पार्टीमा पनि मत नमिलेपछि देवकोटा डेढ-दुई बर्षदेखि निष्कृय बसेका थिए ।
उनी नेपालका बरिष्ठ साहित्यकारको रुपमा पनि चिनिन्छन् । उनले मदन पुरस्कार र साझा पुरस्कार जस्ता प्रतिष्ठित पुरस्कार समेत पाएका छन् । ‘विश्वास’ नामक उपन्यास उनको पछिल्लो कीर्ति हो ।
यो पनि पढ्नुस्
एउटा ‘फूच्चे दार्शनिक’को गुमनाम अन्त्य !
