किन घटे अल्ट्रालाइट चढेर रमाउने पर्यटक ?

३ भदौ, काठमाडौं । पोखराकै आकर्षणका रुपमा रहेको अल्ट्रालाइट चढेर प्राकृतिक दृश्यावलोकन गर्ने यात्रुहरु घटेका छन् । पछिल्लो समय पोखरा पुग्ने पर्यटकको रोजाइमा अल्ट्रा फ्लाइट पर्दै आएको थियो ।

सन् २०१४ मा अघिल्लो वर्षको तुलनामा अल्ट्रालाइट चढ्ने पर्यटक करिव ११ सयले घटेका छन् । २०१४ मा १० हजार ९ सय ७० जना पर्यटकले अल्ट्रालाइटमा उडेर मनोरञ्जन लिएका छन् ।

अघिल्लो वर्ष २०१३ मा अल्ट्रालाइट चढ्ने पर्यटकको संख्या १२ हजार ६४ रहेको थियो । नेपालमा पोखरा र पालुङटारमा अल्ट्रालाइट चढेर दृश्यावलोकन गर्न पाइन्छ ।

खासगरी २०१४ को जनवरी, फेब्रअुरी र मार्च महिनामा अल्ट्रालाइट चढ्ने यात्रु अघिल्लो वर्षको तुलनामा आधाभन्दा बढीले घटेका छन् ।

२०१३ को जनवरीमा १२ सय १४ पर्यटकले अल्ट्रा फ्लाइट गरेकोमा २०१४ को जनवरीमा ४ सय ७८ पर्यटकले मात्र अल्ट्रा फ्लाइट गरेका छन् । मार्च र अपि्रलमा पनि झण्डै आधाले यात्रु घटेको पर्यटन मन्त्रालयको तथ्यांकले देखाउँछ ।

पोखरामा फिष्टेल अल्ट्रालाइट, पोखरा अल्ट्रालाइट र एभिया क्लव गरी तीनटाले सेवा प्रदान गरिरहेका छन् । पालुङटार एयरपोर्टमा एउटा अल्ट्रालाइट रहेको छ ।

अल्ट्रालाइट चढ्ने यात्रुहरू

स्रोतः पोखरा एयरपोर्ट, क्यान

यात्रु घटेपनि अल्ट्रालाइटको फ्लाइट भने अघिल्लो वर्षको तुलनामा २०१४ मा झण्डै दोब्बर बढेको छ । सन् २०१३ मा ६ हजार ४१ फ्लाइट भएकोमा २०१४ मा ११ हजार ८ सय ६४ फ्लाइट भएका छन् ।

अल्ट्रालाइटको फ्लाइट संख्या भन्दा यात्रुसंख्या घटेको पर्यटन मन्त्रालयले सार्वजनिक गरेको तथ्यांकले देखाउँछ । पर्यटकको संख्यामा गिरावट नआए पनि गुणस्तरीय पर्यटक नआदिँदा अल्ट्रालाइट चढ्नेहरु घटेको व्यवसायी बताउँछन् ।

सन् २०१२ सँग तुलना गर्ने हो भने २०१४ मा अल्ट्रालाइट चढ्ने यात्रु दुई गुना धेरै रहेका छन् । २०१२ मा ४ हजार ८ सय १ जना पर्यटकले अल्ट्रालाइट चढेका थिए ।