२३ भदौ, काठमाडौं । दुई वर्ष अघि धादिङमा बाईसीएल कार्यकर्ताको हत्या गरेको अभियोगमा साजन गुरुङ पक्राउ परेका छन् ।
महानगरीय प्रहरी अपराध महाशाखाको टोलीले धादिङ सेमजोङ ८ का नचोक उर्फ साजनल र कारजोन गुरुङलाई पक्राउ परेको हो । साजनमाथि २४ माघ २०७० मा बाईसीएल कार्यकर्ता पवन भन्ने पहलमान तामाङको हत्या गरेको अभियोग लागेको छ ।
२८ वर्षका साजनलाई काठमाडौंको न्यूरोडमा लुकेर बसेको अवस्थामा पक्राउ गरेको महाशाखा प्रमुख एसएसपी सर्वेन्द्र खनालले जानकारी दिए । उनले भने-‘बाहिरबाट ताला लगाएर बस्ने र अपराध गर्ने बेलामा मात्र बाहिर निस्केन गरेका रहेछन् ।’
उनका साथबाट हेमन्त गुरुङको नाममा जारी भएको भारतको मतदाता परिचय पत्र र एक थान चुप्पी समेत बरामद भएको छ ।
प्रहरीका अनुसार साजनले उद्योगी व्यवसायीलाई धम्क्याउने र रकम असुल्ने गरेको पाइएको छ । उनले नुवाकोट धादिङ सडक खण्डका ठेकेदारसँग समेत २० लाख रुपैयाँ मागेको पाइएको छ ।
