२९ कात्तिक, काठमाडौं । भारतीय नाकाबन्दीले हरेक क्षेत्रमा अभाव सिर्जना गरेको समयमा इन्धनको अभाव झनै चर्को छ । ग्यास, पेट्रोल, मट्टीतेल लगायत सबै इन्धन किन्न लामो लाइनको नियति भोगेका सर्वसाधारणले अब दाउरा किन्नसमेत लाइन छिचोल्नै पर्ने देखिएको छ ।
इन्धन संकट टार्न सरकारले आइतबारदेखि काठमाडौंमा दाउरा बिक्री सुरु गर्दा टिम्बर कर्पोरशन अफ नेपाल टीसीएनका बालकुमारी र पशुपति डिपोमा सर्वसाधारणको लाम थेगिनसक्नु भएको छ ।
सर्वसाधारणको लाइन मिलाउन सुरक्षाकर्मी र डिपोमा खटिएका कर्मचारीलाई हम्मे-हम्मे परेको छ । उनीहरुलाई कुपन बाँड्न, दाउरा छान्न, जोख्न र रकम बुझ्न भ्याई नभ्याई देखियो ।
बिहान ९ बजेदेखि वितरण थालिएको बालकुमारी डिपोमा ११ नबज्दै ५ सय कुपन वितरण भइसकेको थियो । दाउरा किनेका सर्वसाधारणहरु भान्सामा चुल्हो बल्ने भन्दै मख्ख देखिए । लाइनमा बसेका कतिपय ग्यास र मट्टतिेलको विकल्प दाउरा हुने भन्दै खुसी व्यक्त गर्दै थिए ।
इमाडोलबाट दाउरा किन्न बालकुमारी डिपो आएकी सुनिता घर्तीले भनिन्-‘ग्यासको लाइनमा बसियो, पाइएन । मट्टीतेल लिन जाँदा पनि रित्तै फर्किनुपर्यो । आज त दाउरा लिएर जाने हो ।’
उनीजस्तै सयौं सर्वसाधरण लाइनमा दाउरा किन्ने कुपन लिन खडा भएका थिए । तर, दाउराका ठूला मुढालाई कसरी घरसम्म पुर्याउने भन्नेमा अधिकांश सर्वसाधारण चिन्तित देखिए ।
बालकुमारीका साजन पौडेलले असन्तुष्टि पोख्र्दै भने-‘यति ठूला मुढाहरु छन् । न बोकेर लैजान सकिन्छ, न भनेको बेला ठेला पाइन्छ । सरकारले दाउरा चिरेरै बेचेको भए सर्वसाधारणलाई सजिलो हुन्थ्यो ।’ सर्वसाधारणले १५ रुपैयाँ किलोको दरले बढीमा एक सय किलोसम्म दाउरा किनिरहेका छन् ।
संघसंस्थाहरुका लागि बढीमा ५ सय किलो दाउरा प्रतिकिलो १७ रुपैयाँका दर बिक्री भइहरेको छ । तराई र चुरे क्षेत्रमा घाटगद्दी गरिएका दाउरा वन मन्त्रालयले बिक्रीका लागि काठमाडौं ल्याएको छ । बाराको पथलैया, पचाहा लगायतका स्थानबाट १० ट्रक दाउरा बिक्रीका लागि काठमाडौं ल्याइएको छ ।
थप तस्वीर हेर्नुस्
तस्वीर : श्रीधर पौडेल र कविन अधिकारी/अनलाइनखबर
प्रतिक्रिया 4