२ जेठ, काठमाडौं । जनयुद्धका मुद्दामा अदालत पीडित संघले नेकपा एमाले र एकीकृत नेकपा माओवादीबीच भएको नौ बुँदे सहमति कार्यान्वयन गर्न माग गरेको छ । संघले सम्झौता कार्यान्वयन नभए आन्दोलनमा उत्रिने चेतावनीसमेत दिएको छ ।
चितवनको भरतपुरमा आइतबार पत्रकार सम्मेलन गरी संघका संयोजक बाबुराम गौतमले नौ बुँदे सम्झौता कार्यान्वयन नगरिए कडा संघर्षमा उत्रिने चेतावनी दिए ।
विस्तृत शान्ति सम्झौता विपरित जनयुद्धकालीन मुद्दा अदालतमा पुर्याइएको र अदालतले जनविरोधी फैसला गर्न थालेको उनले आरोप लगाए ।
जनयुद्धकालीन मुद्दाहरु सत्य निरुपण तथा मेलमिलाप आयोगमार्फत् नै टुंगो लगाउनुपर्ने उनको भनाइ थियो । संयोजक गौतमले जनयुद्धका सबै मुद्दाहरु खारेज गर्न मागसमेत गरे ।
