कजाकिस्तानमा नौसैनिक अभ्यासमा १४ जनाको मृत्यु

News Summary

Generated by OK AI. Editorially reviewed.

कजाकिस्तानको कास्पियन सागर तटीय क्षेत्रमा नौसैनिक अभ्यासका क्रममा समुद्रमा खसेका १७ सैनिकमध्ये १४ जनाको मृत्यु भएको रक्षा मन्त्रालयले जनाएको छ।
पश्चिमी मङ्गिस्टाउ क्षेत्रमा बिहीबार लडाइँ प्रशिक्षणका क्रममा मौसम अचानक बिग्रिएपछि भएको दुर्घटनामा तीन सैनिकलाई उद्धार गरिएको थियो।
राष्ट्रपति कासिम–जोमार्ट टोकायेभले दुर्घटनाबारे छानबिन गर्न सरकारी आयोग गठन गर्न आदेश दिँदै शुक्रबार राष्ट्रिय शोकको दिन घोषणा गरेका छन्।

९ असोज, अल्माटी (कजाकिस्तान) (रासस/एएफपी)। कजाकिस्तानको कास्पियन सागरको तटीय क्षेत्रमा नौसैनिक अभ्यासका क्रममा भएको दुर्घटनामा १४ सैनिकको मृत्यु भएको छ। कजाख रक्षा मन्त्रालयले शुक्रबार थप दुई शव फेला पारेपछि दुर्घटनामा मृत्यु हुनेको सङ्ख्या १४ पुगेको जनाएको छ।

पश्चिमी मङ्गिस्टाउ क्षेत्रमा बिहीबार लडाइँ प्रशिक्षण अभ्यास भइरहेका बेला मौसम अचानक बिग्रिएपछि १७ जना सैनिक समुद्रमा खसेका थिए। तीमध्ये तीन जनालाई उद्धार गरिएको रक्षा मन्त्रालयले जनाएको छ।

मन्त्रालयले शुक्रबार टेलिग्राममार्फत खोज तथा उद्धार अभियान सम्पन्न भएको जानकारी दिँदै दुर्घटनामा १४ सैनिकको ज्यान गएको पुष्टि गरेको हो। यसअघि अधिकारीहरूले १२ जनाको मृत्यु भएको बताएका थिए।

कजाकिस्तानका राष्ट्रपति कासिम–जोमार्ट टोकायेभले दुर्घटनाको कारण र परिस्थितिबारे छानबिन गर्न सरकारी आयोग गठन गर्न आदेश दिएका छन् । घटनाबारे आपराधिक अनुसन्धानसमेत सुरु गरिएको छ।

राष्ट्रपति टोकायेभले शुक्रबारलाई राष्ट्रिय शोकको दिन घोषणा गरेका छन् । दुर्घटनापछि खोज तथा उद्धार कार्यमा संलग्न निकायले समुद्रमा बेपत्ता भएका सैनिकहरूको खोजीलाई प्राथमिकता दिएका थिए। मौसम प्रतिकूल बनेपछि अभ्यासका क्रममा सैनिकहरू समुद्रमा खसेको प्रारम्भिक विवरणमा जनाइएको छ।

ट्रेन्डिङ +

ताजा अपडेट +

जब ‘कथा डबली’ मा जीवन्त भए लाखे र कुमारीका कथा

खेलौनाको पनि ‘लिंग’ : छोरालाई कार, छोरीलाई गुडिया किन ?

यस्ता छन् इन्द्रजात्राका ७ मिथक

पहिरोका कारण सिद्धार्थ राजमार्ग अवरुद्ध