छायांकन अगावै चलचित्र ‘लुट २’को टिजर रिलिज गरिएको छ । काठमाण्डौमा एक कार्यक्रमको आयोजना गर्दै यसको टिजर सार्वजनिक गरियो । निश्चल बस्नेतले निर्देशन गर्ने यो चलचित्रमा सौगात मल्ल, दयाहाङ राई, कर्मा, ऋचा शर्मा लगायतका कलाकारको मुख्य भूमिका रहनेछ । टिजरमा यी ४ कलाकारलाई मुख्य रुपमा देखाइएको छ ।
माधव वाग्ले, नरेन्द्र महर्जन र निश्चल बस्नेतले निर्माण गर्ने यो चलचित्र फागुन १३ गते सार्वजनिक प्रदर्शनमा आउनेछ । चलचित्रको छायांकन यसै साता सुरु हुने जानकारी गराइयो । निर्देशक बस्नेतका अनुसार चलचित्रको कथावस्तु पहिलोको भन्दा फरक हुनेछ । उनका अनुसार चलचित्रको कथामा देशको बर्तमान परिस्थिती, राजनीतिक अस्थिरता, वेरोजगार आदीको कथालाई देखाइनेछ ।
