२४ जेठ, दाङ । पूर्वराष्ट्रपति डा. रामवरण यादवले संविधानप्रति असन्तुष्टि जनाएकाहरुको मागलाई लोकतान्त्रिक विधिमार्फत पूरा गर्नुपर्ने बताएका छन् ।
त्रिभुवन नगर जेसिज र दाङ महिला जेसिजले सोमबार घोराहीमा आयोजना गरेको युवा र गणतान्त्रिक संस्कृति विषयक कार्यक्रममा बोल्दै पूर्व राष्ट्रपति डा. यादवले संविधान संशोधनको बाटो खुल्ला रहेको भन्दै विधिमार्फत असन्तुष्टहरुको माग पूरा गर्नुपर्ने बताएका हुन् ।
मधेसी, थारु र जनजातिहरुको मागलाई मुख्य दलहरुले गम्भीर रुपमा लिँदै लोकतान्त्रिक विधिमार्फत पूरा गर्न संविधान संशोधनको बाटो खुल्ला रहेको डा. यादवको भनाइ छ ।
नयाँ संविधानले सङ्घीय लोकतान्त्रिक गणतन्त्रलाई संस्थागत गरेको भन्दै उनले विधि र संस्कारलाई पालना गर्दै अघि बढ्नु नै संविधानको मर्म हुने धारणा राखे ।
राष्ट्रिय एकताबाट मात्रै देशको समस्या समाधान र विकास सम्भव हुने उनको भनाइ छ । संविधानले दिएको अधिकारलाई प्रयोग गर्दै लोकतान्त्रिक संस्कारको विकास गर्नुपर्ने आजको आवश्यकता भएको डा. यादवले बताए ।
