२६ असार, काठमाडौं । राजधानीको उत्तरी भेगमा रहेको प्राचीन नगरी टोखामा मिनी फनपार्क सञ्चालन भएको छ । करीव १० रोपनी क्षेत्रफलमा पाँच करोड लगानी गरेर फनपार्क सञ्चालनमा ल्याइएको हो ।
टोखा क्येबः मिनी फनपार्क शिवपुरी डाँडाको फेदमा छ । यहाँ शितल, शान्त र स्वच्छ वातावरण उपलब्ध छ । फनपार्कमा मनिराज डंगोलसहित ११ जना स्थानियको लगानी रहेको छ ।
फनपार्कमा बेवी पुल, समुन्द्री छालको अनुभव दिलाउने पुल, स्लाइडिङ पुल, चिल्ड्रेन पार्क, नेपाली तथा नेवारी फाष्टफुड रेष्टुरेन्ट, सभाहल लगायतका सुविधा रहेका छन् । साथै, हर्स राइडिङ, फ्रि वाईफाई लगायतका सुविधाहरु प्नि यहाँ उपलब्ध छन् ।
फनपार्कको स्वीमिङ पुलहरु ५ फिटसम्म गहिरा छन् । जहाँ साना बच्चादेखि बयस्कसम्म स्वीमिङ गर्न सक्छन् । साना बच्चाका लागि सुरक्षित स्वीमिङ पुल बनाइएको छ । यहाँ स्वीमिङ गर्न सर्वसाधारणले ४ सय, विद्यार्थीले ३ सय र समुहमा आउने विद्यार्थीले २ सय रुपैयाँका दरले तिर्नुपर्छ ।
फनपार्कमा नेवारी स्वाद चाख्दै स्वीमिङ गर्न पाइन्छ । रेष्टुरेन्टमा ओखलमा चिउरा कुटेर ग्राहकलाई खुवाउने टोखा क्येबः ट्रेड एन्ड इन्भेष्टमेमन्ट प्रालीका व्यवस्थापन प्रमुख मनिराज डंगोलले बताए । स्थानिय महिलाले ओखलमा चिउरा कुटेको लाइभ हेर्न पाइन्छ ।
स्थानियलाई रोजगारी दिनुका साथै ग्राहकलाई स्थानीय नेवारी परिकार खुवाउनु आफुहरुको उद्देश्य रहेको डंगोलले बताए । फनपार्कमा हरेक शुक्रबार र शनिबार दुई बजेपछि स्थानीय कलाकारले लाइभ म्यूजिकबाट मनोरञ्जन गराउँछन् ।
जाडो महिनामा पानीमा रमाइलो गर्न असहज हुने हुँदा डुंगा चलाएर मनोरञ्जन दिलाउने डंगोलको भनाई छ । ग्राहकहरु डुंगामाथि बसेर खान तथा रमाउन सक्छन् ।
रिङरोडबाट तीन किलोमिटरको दुरीमा रहेको यो फनपार्क ग्रान्डी हस्पिटलबाट १ किलोमिटर माथि पर्छ । टोखा ट्रेकिङ रुट ककनी, गुरुजेभञ्ज्याङ, बाघद्धार तथा सुन्दरीजल जाने सेन्ट्रल प्वाइन्ट हो ।
गुरुजेभञ्ज्याङको पश्चिमतर्फ ककनी, पूर्वतर्फ बाघद्धार तथा सुन्दरीजल सम्मको ट्रेकिङ रुट पर्छ । टोखाबाट नुवाकोटको घ्याङफेदी हुँदै गोसाइँकुण्डको नयाँबाटो ट्रेकिङ गर्न सकिन्छ । सांस्कृतिक पहिचान बोकेको टोखा नगरीलाई पर्यटकीय नगरीका रुपमा विकास गर्ने लक्ष्य रहेको डंगोलले बताए ।
