धेरै नुन खानु यसकारण हुन्छ हानिकारक

वर्षौँसम्म लगातार अत्यधिक नुन हालिएका खानेकुराको सेवन गर्नाले शरीरमा युरिक एसिड बन्ने तथा पिसाबमा एल्बुमिनको मात्रा बढि हुनुका साथै रक्त धमनीहरुलाई समेत क्षतिग्रस्त बनाउने एक अध्ययनले देखाएको छ । धेरै नुनिलोपना भएका खानेकुरा खानेहरुमा उच्च रक्तचापको समस्या पनि बढि पाइने गरेको छ ।

अमेरिकन हार्ट एसोसिएसनले प्रकाशित गरेको सर्कुलेसन नामक शोधपत्रमा यस्तो खतरा औँल्याइएको छ । शोधकर्ताहरुले मानिसले गर्ने सोडियमको खपत र रगतमा युरिक एसिडको स्तरका साथै पिसाबमा एल्बुमिनको मात्रा बीचको सम्बन्धको अध्ययन गरेका थिए । रक्तनलीहरु क्षतिग्रस्त हुँदा पिसाबमा एल्बुमिनको मात्रा बढि पाइन्छ ।

उच्च रक्तचापको औषधि नलिएका मानिसहरुलाई अध्ययन सहभागी गराइएको थियो । धेरै नुन अर्थात् सोडियमको सेवनले मानिसमा समयक्रमसँगै युरिक एसिड तथा एल्बुमिनको समस्या बढाउने गरेको पाइएको छ ।

शोधका अनुसार यदि खानामा नुनको मात्रा बढि भयो भने युरिक एसिड र पिसाबमा एल्बुमिनको मात्रा बढ्दछ । जसका कारण हाइपरटेन्सन हुने खतरा उच्च हुन्छ । कम मात्रामा सोडियमको सेवन गर्ने मानिसमा भन्दा धेरै सोडियमको सेवन गर्ने मानिसमा उच्च रक्तचापको खतरा २१ प्रतिशत बढि हुने गगरेको पाइएको छ ।