१६ साउन, झापा । हुलाकी राजमार्गमा निर्माण भइरहेका पुलहरुमध्ये झापामा बन्न लागेको सबैभन्दा धेरै लागतको पक्की पुलको निर्माण कार्य अलपत्र परेको छ । झापाको महाभारा र कुमरखोद गाविस क्षेत्रमा कन्काई नदीमा निर्माणाधीन पुल अलपत्र परेको हो ।
यो पुल चार वर्षमा बनाइसक्ने सम्झौतासहित ०६८ साल जेठमा निर्माण शुरु गरिएको थियो । जसअनुसार निर्माणको ठेक्का लिएको कम्पनी वीरगञ्जको ‘पप्पु महादेव जेभियर्स’ले ०७२ जेठ मसान्तभित्र यो पुल निर्माण कार्य सम्पन्न गर्नुपर्ने थियो । तर, ठेकेदारको ढिलासुस्ती र लापरवाहीका कारण अहिले यो पुलको करीब ३५ प्रतिशत काम मात्र सम्पन्न भएको छ ।
३० करोड बढी लागत
कन्काई नदीमा यो पुल निर्माण भइसक्दा यसले नेपालकै दोस्रो लामो पक्की पुलको रेकर्ड कायम गर्ने छ । यो पुल निर्माण भइसकेपछि ७ सय २४ मिटर लम्बाइको हुनेछ । जुुन, कणर्ाली नदीमा भएको १ हजार १५ मिटरको नेपालकै सबैभन्दा लामो पक्की पुलपछिको दोस्रो लामो पक्की पुल बन्नेछ ।
पुल निर्माण गर्नका लागि ३० करोड ४० लाख ९० हजार रुपैयाँको बजेट छुट्टयाइएको थियो । तर, पप्पु महादेव जेभीयर्सका सञ्चालक हरिनारायण रौनियारले ठेक्काको करीब २४ प्रतिशत रकम लिएर पुलको निर्माण अलपत्र पारेका छन् ।
हुलाकी सडक योजना कार्यालय, इटहरीले अनलाइनखबरलाई जनाएअनुसार रौनियारले ठेक्का वापतको ७ करोड ५० लाख रुपैयाँ बुझिसकेका छन् ।
४ वर्षमा २० वटा पिल्लर !
पप्पु महादेव जेभियर्स कम्पनीले चार वर्षमा काम सम्पन्न गर्ने गरी सम्झौता गरे पनि तोकिएको मितिसम्ममा ५० प्रतिशत काम पनि सकेन । ठेकेदारको लापरवाहीका कारण यो आयोजनामा ढिलासुस्ती भयो । जसका कारण यो पुलमा हाल २० वटा पिल्लर मात्र निर्माण भएका छन् ।
शुरुका दिनहरुमा काम द्रुत गतिमा भएको भए पनि पछिल्ला वर्षहरुमा निक्कै सुस्त गतिमा काम भएको आयोजनाका चौकीदार खेमकुमार श्रेष्ठ बताउँछन् ।
हुलाकी सडक योजना कार्यालय, इटहरीका योजना प्रमुख शैलेन्द्र त्रिपाठी पनि यो आयोजना निर्माणमा लापरबाही भएको स्वीकार गर्छन् ।
‘पछिल्लो वर्ष बन्द, हड्ताल, नाकाबन्दी जस्ता कारणहरुले समस्या भएको हो ।’, त्रिपाठीले अनलाइनखबरसँग भने, ‘तर, पनि हुनुपर्ने जति काम नभएकै हो ।’
मजदुरले पारिश्रमिक पाएनन्
पप्पु महादेव जेभियर्सका सञ्चालक हरिनारायण रौनियार आयोजना सम्पन्न गर्नु्पर्ने अन्तिम वर्ष पुल निर्माणस्थलमा कहिल्यै आएनन् । उनी सम्पर्कविहीन भए ।
आयोजनाका चौकीदार श्रेष्ठले जनाएअनुसार आयोजनामा कार्यरत करीब १७ मजदुरले ६ महिनाको पारिश्रमिक पनि पाएका छैनन् ।
रौनियारले मजदुरहरुलाई पारिश्रमिक नै दिएनन् । जसका कारण मजदुरहरुको घरमा रहेका बालबच्चाहरुको बिचल्ली भएको श्रेष्ठले जनाए ।
पारिश्रमिक माग्दै रौनियारलाई पटकपटक टेेलिफोन सम्पर्क गरे पनि रौनियारले फोन नउठाएको मजदुरहरुले बताएका छन् ।
स्थानीय उदासीन
आफ्नो गाउँमा देशकै दोस्रो सबैभन्दा लामो पक्की पुल बन्ने भएपछि स्थानीयवासी हषिर्त थिए । सधा विकास निर्माणका फुस्रा भाषण सुन्दै आएका गाउँले पुल निर्माण शुरु भएपछि निक्कै खुशी बने ।
तर, सम्झौताअनुरुप ४ वर्षमा काम सम्पन्न नहुँदा उनीहरु अहिले उदासीन छन् । सरकारी निकायबाट समयसमयमा प्रभावकारी अनुगम नहुँदा यस्तो अवस्था आएको स्थानीय बताउँछन् ।
सम्झौता गरिएको रकम लिने अनि काम पूरा नगर्ने ठेकेदारलाई कारबाही गर्नु पर्ने स्थानीयले माग गरेका छ ।
सप्तरीको बलानमा पनि पप्पुलाई ठेक्का
हुलाकी सडक योजना कार्यालय, इटहरीका प्रमुख त्रिपाठीले दिएको जानकारी अनुसार पप्पु महादेव जेभियर्सले पूर्वमा सप्तरीको बलान नदीमा समेत पुल निर्माण गर्ने ठेक्का पाएको थियो ।
तर, त्यहाँ पनि उसको लापरबाहीका कारण पुल निर्माण सम्झौता गरिएको समयमा नसकिएको बुझिएको छ ।
