२७ भदौ, धनगढी। धनगढी उपमहानगरपालिका क्षेत्रमा भएको अतिक्रमण हटाउन बनाइएको ‘अविलम्ब अतिक्रमण हटाउ अभियान’ कागजमै सीमित हुन पुगेको छ ।
नौ महिनाअघि भएको नगरपरिषद्को बैठकमा कार्यकारी अधिकृत रामलाल श्रेष्ठले उपमहानगर क्षेत्रका खोलानाला, सडक, सार्वजनिक जग्गामा बढ्दै गएको अतिक्रमण हटाउन ‘अविलम्ब अतिक्रमण हटाउ अभियान’को घोषणा गरे पनि अहिलेसम्म यो कार्यान्वयन हुन नसक्दा कागजमै सीमित हुन पुगेको हो ।
परिषद्को बैठकमा गरिएको प्रतिबद्धताबमोजिम अतिक्रमित क्षेत्रको पहिचान गरी प्रतिवेदन तयार पार्न गठन गरिएको समितिले अध्ययन प्रतिवेदन दिएको लामो समय भइसक्दा पनि अभियानको कार्यान्वयन गर्नेतर्फ उपमहानगरपालिका कार्यालयले चासो देखाएको छैन ।
प्रतिवेदन आएपछि अतिक्रमण हटाउन सम्बन्धितलाई सूचना गर्ने र अतिक्रमण हटाउन नमान्नेलाई बल प्रयोग गरी हटाउने तयारी उपमहानगरले नौ महिना अघि नै गरेको थियो ।
खासगरी बजार क्षेत्र हुँदै बग्ने कैलाली नाला, भंगी नाला र सुकुटी नाला मिचेर संरचना निर्माण गर्ने, सडक दायाँ बायाँ बनेका नालीमा फोहर जम्मा हुने गरे पनि त्यसको समयमै सरसफाइ नगर्ने गरिएको कारण थोरै वर्षा हुँदा पनि पानीको निकास हुन नसकेर उपमहानगरको बजार क्षेत्रका वडामा डुबानको समस्या ठूलो छ ।
यस्तै बजार क्षेत्रको मुख्य सडक दायाँ बायाँको भाग मिचेर व्यापार व्यवसाय गर्ने प्रवृत्तिले सडक साँघुरो हुँदै गएको छ । फलस्वरुप सडक साघुँरो भई आवागमनमा निकै समस्या हुने गरेको अनुभव सर्वसाधारणले गर्ने गरेका छन् ।
यसबाहेक सडकमा पर्ने जग्गा मिचेर बनाइने गरिएका संरचनाका कारण बजार क्षेत्रको सडक साँघुरिदै जाँदा बेला बखत ट्राफिक व्यवस्थापनमा समस्या हुने गरेको छ ।
व्यक्तिका नाममा प्रकृतिक खोलाको कतिपय ठाउँको जग्गा दर्ता गरिएको विगतको गल्तीका कारणले नै अहिले आएर डुबानको समस्या भोग्नुपरेको स्थानीयवासीको भनाइ छ ।
उपमहानगरपालिका कार्यालयका इन्जिनियर दिजराज भट्ट भने अतिक्रमण हटाउन तयारी भइरहेको बताउँछन् ।
