२१ चैत, काठमाडौं । दलीय चुनाव चिन्हको माग गर्दै नयाँ शक्ति पार्टी नेपालसहित संसदमा नभएका ६४ दलले आज सोमबार देशभरका निर्वाचन कार्यालय घेराउ गरेका छन् ।
आन्दोलनरत दलका नेता कार्यकर्ताले काठमाडौंमा पनि जिल्ला निर्वाचन कार्यालय घेराउ गरेका छन् । स्थानीय प्रशासनले निषेधित क्षेत्रमा प्रवेश गर्न रोक लगाएपछि आन्दोलनकारीहरुले हनुमानथान नजिकै प्रदर्शन गरिरहेका छन् ।
त्यसक्रममा नयाँ शक्ति पार्टीकी नेतृ हिसिला यमीले स्थानीय तह निर्वाचन ऐनको प्रतिलिपी जलाएकी छन् ।
यही ऐनको दफा २६ को उपदफा ६ र ७ का कारण संसदमा भएका बाहेकका अन्य दलले स्थानीय चुनावमा दलीय चुनाव चिन्ह नपाउने भएका हुन् ।
नयाँ शक्तिको नेतृत्वमा आन्दोलनमा उत्रिएका ६४ दलले यसलाई खारेज गर्न माग गरेका छन् ।
यसअघि निर्वाचन आयोगको केन्द्रीय कार्यालय धेराउ गर्न गएका नेताहरुमाथि प्रहरीले धरपकड गरेको थियो । साँझ प्रहरीले रिहा गरेपछि नेताहरु बाहिर निस्कन नमानेपछि प्रहरीले बल प्रयोग गरेको थियो ।
प्रतिक्रिया 4