कनकाई नगरपालिकाको वडाध्यक्षमा बाबुछोरी उम्मेदवार

कनकाईका ८ वडा माओवादीले उम्मेदवार टुंगो लगायो

गौरव पोखरेल

२०७४ वैशाख १७ गते १३:५२

१७ बैशाख, झापा । २ दशकपछि हुन लागेको स्थानीय तहको निर्वाचनमा झापाको कनकाई नगरपालिकाका दुई वडामा बाबुछोरी वडाध्यक्षका उम्मेदवार भएका छन् ।

नेकपा माओवादी केन्द्रले कनकाईका वडा नम्बर ३ र ४ मा बाबु छोरीलाई वडाध्यक्षको उम्मेदवार बनाएको हो ।

नगरपालिकाको वडा नं. ३ मा अम्बिका चापागाईं (सुवेदी) र वडा नं. ४ मा उनका पिता गोविन्दप्रसाद चापागाईंलाई वडाअध्यक्षको उम्मेदवार बनाइएको माओवादी केन्द्रका नगर ईञ्चार्ज गोपाल प्रसाईंले बताए ।

अर्को रोचक कुरा के छ भने गोविन्द २०५४ सालमा सम्पन्न स्थानीय तहको निर्वाचनमा पनि सोही वडाबाट अध्यक्षमा निर्वाचित भएका थिए । त्यतिबेला एमालेबाट चुनाव जितेका उनी शान्ति प्रक्रिया सुरु भएपछि माअेावादीमा प्रबेश गरेका थिए ।

यता छोरी अम्बिका माओवादी केन्द्र निकट अनेमसंघ क्रान्तिकारीकी नगर उपाध्यक्ष हुन् । साथै, उनी अन्य विभिन्न संघसंस्थामा पनि आबद्ध छिन् ।

कनकाईको कुन वडामा को ?

माओवादीले कनकाई नगरको ८ वटा वडामा उम्मेदवार टुंगो लगाएको छ ।

पार्टीका अनुसार वडा नं. १ मा हरी राउत, ३ मा अम्बिका चापागाईं (सुवेदी), ४ मा गोविन्द चापागाईं, ५ मा प्रेमप्रसाद ओली, ६ मा दीर्घबहादुर थापा, ७ मा चन्द्रमान कन्दङ्वा, ८ मा युवराज मैनाली र वडा नं. ९ मा अजित कायस्थलाई वडाध्यक्ष पदमा उठाउने निर्णय भएको छ ।

वडा नं. २ मा भने छिटै उम्मेदवार टुंगो लगाइने बताइएको छ ।

मेयरमा घिमिरे र उपमेयरमा अधिकारीको चर्चा

माओवादी केन्द्रबाट कनकाई नगरमा मेयरका लागि कृष्ण घिमिरे र उपमेयरका लागि शान्ता अधिकारी झाको नाम चर्चामा छ । उनीहरु मेयर र उमेयरको उम्मेदवारका रुपमा लगभग निश्चित भएको पार्टी स्रोतले जनायो ।

घिमिरे पूर्व शिक्षक हुन् भने अधिकारी अनेमसंघ क्रान्तिकारीकी नगर अध्यक्ष हुन् ।