१९ असार, अर्घाखाँची । अर्घाखाँची जिल्लाका ६ स्थानीय तहको मत परिणाम सार्बजनिक भएको । ६ स्थानीय तहमध्ये नेपाली कांग्रेसले चार तह जितेको छ ।
सन्धिखर्क नगरपालिका, सितगंगा नगरपालिका, छत्रदेव गाउँपालिका र पाणिनी गाउँपालिकासहित २५ वडामा जित हासिल गर्दै कांग्रेस अर्घाखाँची जिल्लामा पहिलो पार्टी भएको छ ।
कांग्रेसबाट सन्धिखर्क नगरपालिका प्रमुखमा कमलप्रसाद भुसाल, सितगंगा नगरपालिका प्रमुखमा सुर्यप्रसाद अधिकारी, भुमिकास्थान नगरपालिका उपप्रमुखमा खडानन्द बेल्वासे, छत्रदेव गाउँपालिका अध्यक्षमा लेखनाथ पोख्रेल, उपाध्यक्षमा तुल्सादेवी श्रेष्ठ र पाणिनी गाउँपालिका अध्यक्षमा अच्युत गौतम विजयी भएका छन् ।
अर्घाखाँचीमा कांग्रेस र माओवादी केन्द्रले तालमेल गरेर चुनाव लडेका थिए । माओवादी केन्द्रले भूमिकास्थान नगरपालिका प्रमुख तथा सन्धिखर्क र सितगंगा नगरपालिकाको उपप्रमुख जितेको छ ।
माओवादी केन्द्रबाट भुमिकास्थान नगरपालिका प्रमुखमा रेशम थापा, सन्धिखर्क नगरपालिका उपप्रमुखमा ठाकुरकुमार विक र सितगंगा नगरपालिका उपप्रमुखमा टिका रेश्मी विजयी भएका हुन् । माओवादीले ७ वटा वडामा पनि जित हासिल गरेको छ ।
नेकपा एमाले एक गाउँपालिकाको अध्यक्ष र २ गाउँपालिकाको उपाध्यक्ष जितेको छ । एमालेबाट मालारानी गाउँपालिकाको अध्यक्षमा बालकृष्ण आचार्य, उपाध्यक्षमा प्रमिला क्षेत्री, पाणिनी गाउँपालिकाको उपाध्यक्षमा लक्ष्मी गौतम विजयी भएका छन् । एमालेले २५ वटा वडामा र राष्ट्रिय जनमोर्चाले ४ वडामा जित हासिल गरेका छन् ।
