बाढीले भिजेको अन्न टुसायो, अब के खाने ?

चिसो आँगनमा गुइँठा बाल्ने प्रयास गर्दै कलावती

आरपी सुवेदी

२०७४ साउन ३० गते १५:४९

३० साउन, नेपालगञ्ज । चार दिनदेखि परेको अविरल वर्षा सोमबारबाट केही थामिएको छ । बाढीको पानी कम भएको छ तर, हटिसकेको छैन । तर, बाँकेको डुडुवा गाउपालिका-१ टेपरीकी कलावती यादवको आँगन अझै ओभाएको छैन ।

दुई दिनदेखि भोकै रहेकी कलावती त्यही भिजेको आँगनमा गुइँठा बालेर गहुँको भिजेको पीठोबाट ‘भौवरी’ बनाउने कोशिशमा छिन् ।

घरमा भएको सबै अन्नबाली बाढीले भिजेको छ । यो पीठो पनि उनले पिप्रहवाबाट ल्याएकी हुन् । भन्छिन्, ‘घरमा भएको सबै अनाज कुहिसकेको छ । ८ जनाको परिवार छ, कसरी गुजारा गर्ने ? अहिले यो ‘भौवरी’ पोल्दैछु ।’

उनको परिवारले जम्मा तीन किलो मात्र गहुँको पीठो किन्न पाएको छ । त्यसपछि के खाने थाहा छैन ।

राप्ती र डुडुवा नदीको किनारका बस्तीका धेरै परिवारको अवस्था कलावतीको भन्दा फरक छैन । घरमा भएको अन्नबाली सबै भिजेर टुसा आउन थालिसके । पिउने पानीको पनि अभाव छ । तर, सरकारी राहत पुग्न सकेको छैन ।

स्थानीय जितबहादुर मौर्यले भिजेकै अनाज खाएर बस्नुपर्ने बाध्यता सुनाए । अब भिजेको अनाज कुहिन लागेकाले के खाने समस्या भएको भन्दै उनले भने-‘बाहिरबाट हेर्दा घर छ । तर त्यो घरमा बस्न सक्ने अवस्था छैन ।’

चिम्मन यादवले राप्ती र डुडुवाको भेल एक्कासी गाउँमा पस्दा आफ्नो सबै सकिएको गुनासो गरे ।

वर्षभरि खान पुग्ने गहुँ र अन्य अनाज बाढीको पानीले बगाएकोले ८ जनाको परिवार कसरी गुजारा चलाउने चिन्ताले सताएको छ । ‘घरमा भएको अनाज यस्तो भएको छ । कसरी खाने हो हिजो (शनिबार) विहानदेखि घरमा खाना पाकेको छैन । के पकाउने भएको सबै भिजेर कुहियो’-बाढीले भिजाएको गहुँ देखाउँदै उनले भने ।