२०७४ असोज २४ गते ११:१२ 
रियल मड्रिडका सुपरस्टार ग्यारेथ बेलको मुलुक वेल्स सन् २०१८ मा रुसमा हुने विश्वकप फुटबलमा छनोट हुन असफल भएको छ । जेम्स म्याकलिनको गोलको सहयोगमा जित हासिल गर्दै रिपब्लिक अफ आयरल्याण्ड भने छनोट चरणको प्लेअफमा पुगेको छ ।
कार्डिफ सिटी रंगशालामा घरेलु टोली वेल्सले पहिलो हाफमा बलियोसँग बल नियन्त्रणमा लिएको थियो । तर आयरल्याण्डको शानदार डिफेण्डिङ र फिजिकल गेमका कारण उनीहरु गोल गर्नबाट निराश बने ।
दोस्रो हाफमा आयल्याण्डको आत्मविश्वास बढ्यो । ५७औं मिनेटमा म्याकलिनको हाफ भली शट उत्कृष्ट गोलमा परिणत हुदा वेल्स एक गोलले पछि पर्यो । र, त्यही गोलले वेल्सको विश्वकप सपना चकनाचुर पारिदियो ।
वेल्सले त्यसपछि आयरल्याण्डको डिफेन्स लाइन तोड्न सकेन । खेलमा राम्रा अवसरहरु सृजना हुन सकेनन् ।
यो खेलमा जसले जितेपनि प्लेअफका लागि स्थान सुरक्षित हुने थियो । त्यसमा आयरल्याण्डले बाजी मार्यो । त्यसोत छनौटमा वेल्सले पहिलो पराजय ब्यहोरेको हो । उसले यसअघि ४ जित र ५ बराबरी खेलेको थियो ।
यस समूह डीबाट सर्बियाले विश्वकपमा स्थान सुरक्षित गरेको छ । वेल्सले सर्वियासँग दुवै खेल बराबरी खेलेको थियो ।
सन् २०१६ को युरोकपमा वेल्सले सेमिफाइनलसम्मको एतिहासिक यात्रा तय गरेको थियो । त्यो उसको ठूला प्रतियोगितामा सबैभन्दा ठूलो उपलब्धि थियो ।
वेल्स फुटबलको गोल्डेन जेनेरेसन मानिएको यो टिम रुस विश्वकपमा छनौट भएको भए सन् १९५८ पछिको पहिलो सहभागिता हुने थियो । तर, सुपरस्टार स्ट्राइकर ग्यारेथ वेल चोटका कारण नियमित खेल्न नसकेपछि वेल्सको विश्वकप सहभागिता पूर्णबिराम लागेको छ ।
वेल्स यसअघि सन् १९७८ र सन् १९९४ को विश्वकप छनौटमा पनि अन्तिम समयमा असफल भएको थियो ।
प्रतिक्रिया 4