१३ कात्तिक, पोखरा । प्रदेश ४ का जिल्लामा वाम गठबन्धनले उम्मेदवार बाँडफाँटको टुंगो लगाएको छ । उम्मेदवार छनोट कार्यदलले टुंगो लाग्न बाँकी जिल्लाको छिनोफानो गरेको हो ।
एमाले र माओवादी केन्द्रले २१ मंसिरमा हुने प्रतिनिधिसभा र प्रदेशसभाको निर्वाचनका लागि प्रत्यक्षतर्फ तथा केही समानुपातिक सिट बाँडफाँटलाई अन्तिम रुप दिएका छन् ।
दुवै दलका शीर्ष नेताबीच शुक्रबारदेखि उक्त प्रदेशअन्तर्गत् प्रतिनिधि सभाका १८ र प्रदेश सभाका ३६ सिट बाँडफाँटबारे छलफल सुरु भएको थियो । छलफल सकिएपछि एमालेले समानुपातिकको समेत बन्दसूची तयार पारेको छ ।
जसअनुसार प्रतिनिधि सभाका १३ सिट एमालेको भागमा परेका छन् भने माओवादीको भागमा पाँच । प्रदेश सभातर्फ एमाले १९, माओवादी १५ र राष्ट्रिय जनमोर्चाले २ सिट पाएका छन् ।
प्रतिनिधि सभामा एमाले १३, माओवादी ५, प्रदेश सभामा एमाले १९, माओवादी १५ र राजमो २
कास्कीमा एक प्रतिनिधि सभासहित प्रदेशका २ सिट माओवादीले मागेको थियो । त्यसमध्ये प्रदेशका तीन सिटमा चित्त बुझाएको छ ।
माओवादीले पाएका सिटमध्ये पूर्वजिल्ला इन्चार्ज झलकपाणि तिवारीलाई कास्की १ (क) र वर्तमान इन्चार्ज राजकाजी गुरुङलाई २ (ख)मा टिकट दिने भएको छ । यस्तै, कास्की ३ (क)मा रामजी बराललाई उम्मेदवार बनाउने तयारी उक्त पार्टीको छ ।
प्रतिनिधि सभामा कास्की १ बाट एमाले नेता खगराज अधिकारी, २ बाट रवीन्द्र अधिकारी र ३ बाट जगत विश्वकर्माले टिकट पाउने चर्चा छ । यद्यपि, विश्वकर्माको नाम टुंगो नलागेको स्रोतले जनाएको छ ।
प्रदेश ४ मा वाम गठबन्धनको सिट बाँडफाँट
प्रतिनिधि सभा
एमाले १३
माओवादी ५
प्रदेशसभा
एमाले १९
माओवादी १५
जनमोर्चा २
