२१ मंसिर, काठमाडौं । काठमाडौं जिल्लाको मतगणना आज नहुने भएको छ । भोलि बिहान सर्वदलीय बैठक बसेर मतगणना सुरु गर्ने काठमाडौं जिल्लाका मुख्य निर्वाचन अधिकृत रमेश पोखरेलले जानकारी दिए ।
मतदान केन्द्रबाट सबै मतपेटिका संकलन गरी गणनास्थलमा पुर्याउने, सर्वदलीय बैठक बसेर सहमति जुटाउने लगायतका प्रक्रिया पूरा गर्नुपर्ने भएकाले आजबाट मतगणना नहुने पोखरेलले बताए ।
काठमाडौं जिल्लामा १० वटा निर्वाचन क्षेत्र रहेका छन् । ती सबैको निर्वाचन मतगणना एकै ठाउँमा गर्दा ढिलाइ हुने भएकाले विभिन्न स्थानमा मतगणना गर्ने तयारी निर्वाचन आयोगले गरेको छ ।
काठमाडौंका मुख्य निर्वाचन अधिकृत पोखरेलका अनुसार निर्वाचन क्षेत्र नं. १, २, ३ र ४ राष्ट्रिय सभागृहमा मतगणना हुनेछ ।
त्यसैगरी, निर्वाचन क्षेत्र नं. ५ र ७ को सहकारी विकास विभागको तालिम केन्द्र बानेश्वरमा मतगणना हुनेछ ।
त्यसैगरी, निर्वाचन क्षेत्र नं. ९ र १० अन्तराष्ट्रिय सम्मेलन केन्द्रमा बानेश्वरमा मतगणना हुनेछ ।
निर्वाचन क्षेत्र नं. ८ को वन परिसर बबरमहलमा र निर्वाचन क्षेत्र नं. ६ को जिल्ला समन्वय समिति बबरमहलमा मतगणना हुने तयारी भएको छ ।
यो पनि पढ्नुहोस्
दोस्रो चरणमा मतदान भएका अधिकांश जिल्लाको मतगणना भोलि, पहिलो चरणको गणना आजै
