२६ पुस, वीरगञ्ज । पर्सामा चीसोले कठ्यांग्रिएर थप दुई जनाको मृत्यु भएको छ ।
चिसोका कारण दुई जनाको मृत्यु भएको र दुवै जना जिराभवानी गाउँपालिकाको रहेको जिल्ला प्रहरी कार्यालय पर्साका प्रवक्ता डिएसपी राजन लिम्बुले जानकारी दिए ।
जिराभवानी गाउँपालिका वडा नं १ महादेवपटि्ट पकडीटोलाका ६० वर्षीय कमल खवास थारु सुतिरहेकै अवस्थामा मृत भेटिएका हुन् । चिसोले कठ्यांग्रिएर उनको बिहान २ बजेतिर मृत्यु भएको भएपनि प्रहरीलाई बिहान साढे १० बजेतिर मात्रै जानकारी आएको जिल्ला प्रहरी कार्यालय पर्साले जानकारी दिएको छ ।
त्यसैगरी जिराभावनी गाउँपालिका वडा नं १ महादेवपट्टीको तमरीटोल बस्ने ३५ वर्षका शम्भु महरा चमारको पनि जाडोकै कारण मृत्यु भएको छ । उनी पनि बिहान मृत भेटिएका थिए । मृतकहरुको आर्थिक अवस्था कमजोर रहेको र न्यानो ओढ्ने कुराको अभावमा ज्यान गएको स्थानीयले बताएका छन् ।
यसअघि मंगलबार बिहान वीरगञ्ज महानगरपालिका वडा नं १८ भवानीपुरमा चिसोले कठ्यांग्रिएर स्थानीय ५० वर्षीया मञ्जु मण्डलको मृत्यु भएको थियो ।
