अफगानिस्तानको एउटा सानो गाउँमा जब असादुल्लाह पोयाकी श्रीमतीले उनीहरुको तेस्रो सन्तानलाई जन्म दिइन् उनको दिमागमा तुरुन्तै डोनाल्ड ट्रम्पको नाम आयो ।
तर, उनले त्यतिबेला अमेरिकी राष्ट्रपति पदको दौडमा रहेका व्यक्तिलाई होइन, सेलिब्रेटी व्यापारी डोनाल्ड ट्रम्पलाई सोचिरहेका थिए ।
पोयाले भर्खरै एउटा अनुवादित किताब पढेका थिए, जसको शीर्षक थियो ट्रम्पः हाउ टु गेट रिच । सन् २००४ मा प्रकाशित भएको यो किताब त्यतिबेला निकै चर्चित बनेको थियो ।
‘मलाई उनको व्यक्तित्व मन परेको थियो । मैले सोचेँ कि उनी अर्थशास्त्रमा उत्कृष्ट छन् र राजनीतिमा महान छन्,’ पोयाले भने ।
जब उनकी श्रीमतीले २०१६ को अगष्टमा छोरा पाइन्, उनले छोराको नाम राखिदिए डोनाल्ड ट्रम्प ।
उनले सोचेका थिए, यो नाम छोरालाई फाप्ने छ । तर त्यस्तो भएन । सुरुमा त आफ्नो नातिलाई गैर मुस्लिम नाम दिइएकोमा पोयाका आमाबाबु नै रुष्ट भए । यसैगरी गाउँमा रहेका मस्जिदका उनको व्यापक आलोचना भयो ।
‘दिनदिनै यो नामले दुख दिन थाल्यो,’ पोया भन्छन्, ‘प्रत्येक दिन जब म घरमा छोरालाई ट्रम्प भनेर बोलाउथेँ, मेरो बुवा रिसले आगो बन्नुहुन्थ्यो ।’
त्यसपछि पोयाले कठोर निर्णय लिए । उनले आफ्नो मास्टरी जागिर छोडिदिए, खेत बेचिदिए र परिवारलाई लिएर काबुलतिर लागे ।
पोया र उनका बच्चाहरु, डोनाल्ड ट्रम्प, उनकी दिदी फतिमा र भाइ करिम, अहिले काबुलमा एकतल्ले घरमा बस्छन् । तर यहाँ पनि पोयाको दुख सकिएन ।
गत बिहीबार पाँच जना छिमेकीहरुले उनको घरबेटीलाई भेटे र पोयालाई घरबाट निकाल्न दबाब दिए । उनीहरुको पनि आपत्ति ‘ड्रोनाल्ड ट्रम्प’ प्रति नै थियो । भविष्यमा अमेरिकामा शरणार्थीको भिसा पाउन सजिलो हुने भनेर उनले छोराको गैरमुस्लिम नाम राखेको उनीहरुमध्ये केहीले आरोप लगाए ।
पोया आफूले आफ्नो देश छोड्न नचाहेको बताएँछन् । साथै आफ्नो छोरा समाचारमा आओस भनेर यो नराखेको पनि उनको भनाइ छ । उनका अनुसार स्थानीय एक सरकारी अधिकारीले उनको छोराको परिचयपत्र फेसबुकमा राखिदिएका थिए । यसले लगत्तै सामाजिक सञ्जाल तताएको थियो ।
थुप्रै आक्रोशित सन्देश र धम्कीहरु आएपछि आफू र आफ्नी श्रीमतीले फेसबुक पेज नै ब्लक गर्नुपरेको पोयाले बताए । फेसबुकमा एक जनाले आफू चार व्यक्तिहरुलाई लिएर उनलाई मार्न आउन लागेको सन्देशसमेत पठाएका थिए ।
‘जाबो एउटा नाममा पनि यत्रो बितन्डा ?’ पोया भन्छन्, ‘के मलाई आफ्नो छोराको नाम राख्ने अधिकार छैन ?’
उनी अहिले पनि छोराको नाम बदल्ने मुडमा छैनन् । बरु एक दिन अमेरिकी राष्ट्रपतिले आफ्नो छोरालाई बोलाएर भेट्ने आशामा छन् ।
