३, असार, चितवन । आइतबार साँझ पानीसँगै आएको पहिरोले नारायणगढ मुग्लिन सडकखण्ड आइतबार साँझ ७ बजेदेखि एकतर्फी सञ्चालनमा आएको छ ।
इच्छाकामना गाउँपालिका ६ स्थित जलविरे भन्ने ठाउँमा पहिरो झरेपछि सडक अवरुद्ध भएको नारायणगढ मुग्लिन सडक आयोजनाका सूचना अधिकारी शिव खनालले जानकारी दिए ।
साँझ पौने ६ बजे पहिरोसँगै रुख र बिजुलीको पोलसमेत लडेकोले त्यसलाई हटाएर दुई तर्फी सडक सञ्चालन गर्न समय लाग्ने चितवनका ट्राफिक प्रहरी प्रमुख वेदप्रसाद गौतमले बताए ।
सडकमा सवारीको चाप बढी छ । पहिरो झरेपछि मुग्लिनमै सवारी साधनलाई रोकेको विस्तारै पठाउने काम गरिएको उनले बताए । कालोपत्रे गरेर एक हप्ता सहज भएको यो खण्डमा बर्खा लागेसँगै पटकपटक पहिरोले दुःख दिन थालेको छ ।
