९ साउन, बुटवल । प्रदेशसभामा सबै विषयगत समितिको नेतृत्व निर्विरोध चयन भएको छ ।
सत्तारुढ नेकपासँगै प्रतिपक्षी कांग्रेस र संघीय समाजवादी फोरम नेपालबीच प्रदेशसभा समितिको नेतृत्वको भागबण्डा मिलेपछि निर्विरोध सभापति चयन भएको हो ।
प्रदेश ५ को प्रदेशसभामा ६ वटा समिति छन् । बुधवार बसेका तीन विषयगत समितिका छुट्टाछुट्टै बैठकले समितिको सभापति चयन गरेको हो भने तीन समितिको सभापति चुन्न बिहीबार हुने निर्वाचनका लागि पनि एकल उम्मेदवारी परेको छ ।
सार्वजनिक लेखा समितिको सभापतिमा कांग्रेसका डिल्लीबहादुर चौधरी चयन भएका छन् ।
अर्थ, उद्योग तथा पर्यटन समितिमा नेकपाका दधिराम न्यौपाने र भौतिक पूर्वाधार तथा विकास समितिमा नेकपाकै आशा स्वर्णकार निर्विरोध निर्वाचित भएका हुन् ।
प्रदेश मामिला तथा कानून समितिको सभापतिमा दामा कुमारी शर्मा, सामाजिक विकास समितिको सभापतिमा दृगनारायण पाण्डे र भूमि व्यवस्था तथा कृषि समितिको सभापतिमा विजयबहादुर यादवको मात्र उम्मेदवारी परेको छ ।
एकल उम्मेदवारी परेकाले तीनैजना स्वतः निर्वाचित भएको र त्यसलाई भोलि औपचारिकता दिइने प्रदेशसभा सचिवालयका प्रवक्ता ईश्वरीप्रसाद शर्माले जानकारी दिए ।
शर्मा र पाण्डे नेकपा तथा यादव संघीय समाजवादी फोरमका प्रदेशसभा सांसद हुन् ।
