२६ भदौ, रामेछाप । सदरमुकामको साँघुरो र व्यस्त सडकमा दुर्घटनाको डर बढेपछि ट्राफिक प्रहरी त्यसको व्यवस्थापनमा जुटेको छ ।
पैदलयात्रीहरु सडकको बीचबाटै हिँड्न थालेपछि ट्राफिक प्रहरीले सर्वसाधारणलाई पेटीबाट हिँड्न अनिवार्य गरेको छ । त्यस्तै बजार क्षेत्रमा सवारी साधनको गति पनि प्रतिघण्टा २० किलोमिटरमात्र कायम गरिएको छ ।
जिल्ला ट्राफिक प्रहरी कार्यालयका प्रमुख रामेश्वर पाण्डेले पैदलयात्रीलाई पेटीमा हिँडाउन ट्राफिक प्रहरी परिचालन गरिएको बताए । सडकमा हिँड्दा नागरिकलाई सुरक्षित महशुस हुने गरी काम गरिने उनको भनाइ छ ।
‘मानिसहरुको सडकबाटै हिँड्ने गर्छन्, त्यसैले पेटिबाट हिँड्ने बानी पार्न हामी लागेका छौं । केही समय त लाग्ला तर हामी यो काम गरेरै छाड्छौं’, पाण्डेले भने । स्थानीय सरकारसँग सहकार्य गरी सडकका विभिन्न स्थानमा सडक रेखा काटी व्यवस्थित बनाउने पनि उनले बताए ।
त्यस्तै बजार क्षेत्रमा २० किलोमिटर प्रतिघण्टा भन्दा बढी गतिमा सवारी साधन चलाउन नपाउने नियम बनाएको पाण्डेले बताए ।
प्रहरीले सडकमा हिँड्न कडाई गरेपछि मानिसहरु पेटीबाट हिँड्न त थालेका छन् । तर अझै पनि सडक पेटीमा निर्माण सामग्री थुपार्ने, निर्माण सकिए पछि पनि माटो र फोहोर थुपार्ने गरिदिँदा धेरै ठाउँमा पेटीसमेत खाली छैन । स्थानीयले सडक पेटी सफा गरिदिनुपर्ने मन्थलीका शिवकुमार कार्की बताउँछन् । ठाउँठाउमा बिगि्रएको सडक पेटी सम्बन्धित निकायले तत्काल मर्मत गर्नुपर्ने उनको भनाइ छ ।
