२ मंसिर, काठमाडौं । काठमाडौंको भृकुटीमण्डपमा आयोजित ‘हस्तकला व्यापार मेला’ बाट व्यवसायीहरु उत्साहित भएका छन् । आईतबार सम्पन्न १६ औं हस्तकला व्यापार मेलामा सहभागी भएका व्यवसायीहरु मेलामा भएको कारोबारबाट उत्साहित देखिएका हुन् ।
५ दिनसम्म चलेको मेला सबै हिसाबले धेरै सफल भएको नेपाल हस्तकला महासंघका निवर्तमान अध्यक्ष एवम् मेला आयोजक समितिका संयोजक हेमरत्न शाक्यले दाबी गरे । विदेशीसहित करिव २ सय स्टल रहेको मेलामा सहभागी अवलोकनकर्ताहरुको भीडले पनि आफूहरुलाई उत्साही बनाएको शाक्यको भनाइ छ ।
मेलामा करिव नौं करोडको कारोबार भएको अनुमान गरिएको छ । डेढ लाखले अवलोकन गरेको पनि मेला आयोजक समितिले जनाएको छ । मेलामा भारत, चीन, पाकिस्तान, श्रीलंका, बंगलादेश, भुटानसहितका अन्तर्राष्ट्रिय व्यापारीहरुले पनि स्टल राखेका थिए ।
यता, अवलोकनकर्ताहरुले पनि मेला सहज र सस्तो भएको भन्दै खुसी व्यक्त गरेका थिए । उनीहरुले नयाँ-नयाँ वस्तुहरुको उत्पादनले नेपाली हस्तकलाको मेला विगतभन्दा धेरै राम्रो हुँदै गएको पनि स्मरण गरेका छन् ।
मेलामा काष्ठकला, सुनचाँदी, ऊनी तथा सुती र ढाकाका सामान, पश्मिना, हाते कागजका सामान, छालाजन्य सामान, बास र जडिबुटीका सामग्रीहरु मुख्य आकर्षणमा रुपमा राखिएका थिए ।
नेपालको हस्तकला सामग्रीको विश्व बजारमा उच्च माग रहँदै आएको छ । नेपाली हस्तकलाको आन्तरिक बजारमा वाषिर्क १० अर्ब बराबरको खरिद बिक्री हुने गरेको छ भने त्यसै अनुपातमा अन्तर्राष्ट्रिय बजारमा पनि निर्यात हुने गरेको बताइएको छ ।
