१२ मंसिर, हेटौंडा । मकवानपुरको दामनमा पर्यटन प्रवद्र्धनका लागि मकवानपुरे युवासहित ६० साइकलिस्टले साइकलिङ गर्ने भएका छन् ।
सरकारले पहिचान गरेको एक सय पर्यटन गन्तव्यमा पर्ने दामनलाई पर्यटकमाझ परिचित गराउन जिल्ला साइकलिङ संघको आयोजनामा आउँदो शुक्रबार र शनिबार साइकलिङ गर्न लागिएको हो ।
विभिन्न पाँच जिल्लासहित मकवानपुरका साइकलिस्ट कार्यक्रममा सहभागी हुने आयोजकले जनाएका छन् ।
साइकलिङ संघका अध्यक्ष संगीत श्रेष्ठले प्रत्येक वर्ष पर्यटन प्रवद्र्धनको अभियान चलाएअनुसार यसवर्ष साइकलिङ गर्न लागेको बताए । ‘गएका वर्ष पनि मकवानपुरकोे पर्यटकीय गन्तव्य चित्लाङ र मार्खुमा पुगेका थियौँ । यो वर्ष ६० जना साइकलिङमा रहेका युवा दामन पुग्न लागेका हौँ’ उनले भने ।
हेटौंडाबाट शुक्रबार थालिने साइकलिङमा पूर्वी नेपालको सुनसरी, बारा, पर्सा, रौतहटसहित काठमाडौं र ललितपुरका साइकलिस्ट सहभागी हुने उनले बताए । सहभागीबाट नै प्रति व्यक्ति ३ हजार रुपैयाँ सहयोग उठाएर आवश्यक खर्चको व्यवस्थापन गरेको संघले जनाएको छ ।
सरकारको छनोटमा परेका देशका एक सय नयाँ पर्यटन गन्तब्यमा मकवानपुरमा दामन, चित्लाङ र मकवानपुरगढी परेका छन् ।
