२५ मंसिर, काठमाडौं । मध्यपश्चिमाञ्चल विश्विद्यालयमा पछिल्लो समय चर्केको आन्दोलनको विषयलाई लिएर सत्तारुढ दल नेकपाको विद्यार्थी संगठनमा आवद्ध विद्यार्थीहरु नै विभाजित भएका छन् ।
आन्दोलनका क्रममा केही समयअघि सत्तारुढ नेकपाका विद्यार्थीसहितले मप विश्वविद्यालयका उपकुलपति प्राध्यापक डाक्टर उपेन्द्र कोइरालालाई बाँकेमा अभद्र व्यवहार गरेको भन्ने विषयलाई लिएर विद्यार्थीहरु विभाजित भएका हुन ।
अभद्रव्यवहार गरेको भन्दै उपकुलपतिले मुद्दा दर्ता गरेपछि नेविसंघका नेताहरुसहित अखिल क्रान्तिकारीका केन्द्रीय सदस्य देवीचन्द्र उपाध्याय र अखिलका नेता तथा मप विश्वविद्यालयका स्ववियु सचिव भरत शाही सोमबार पक्राउ परेका थिए ।
पक्राउ परेका नेताहरुलाई रिहाइ गर्न भन्दै अनेरास्ववियुका कार्यबहाक अध्यक्ष रश्मी आचार्य, क्रान्तिकारीका अध्यक्ष रञ्जित तामाङ र नेविसंघका अध्यक्ष नैनसिंह महरले मंगलबार संयुक्त विज्ञप्ति प्रकाशित गरेका छन् । विज्ञप्तिमा रिहाइ नगरिए कडा आन्दोलन गर्ने चेतावनी दिइएको छ ।
यो पनि पढ्नुहोस नेता रिहाइको माग गर्दै तीन विद्यार्थी संगठनले दिए अान्दोलनको चेतावनीयता अखिलका महासचिव ऐन महरले भने छुट्टै विज्ञप्ति प्रकाशित गरी नेविसंघको भाइ बन्न खोजेको भन्दै कडारुपमा आपत्ति जनाएका छन् । उनले भ्रष्ट पदाधिकारीलाई बचाउमा संगठनको लेटरप्याड दुरुपयोग गरेको आरोपसमेत लगाएका छन् ।
महरले जारी गरेको विज्ञप्ति हालै निलम्बित रजिष्ट्रार महेन्द्रबहादुर मल्लको पक्षमा सुरु भएको आन्दोलनसँग केन्द्रित छ । तर, महरले निलम्बित रजिष्ट्रार मल्लको पक्षमा संगठन लागेको आरोप लगाए पनि रिहाइ गर्न माग गरिएका विद्यार्थीहरु यसअघिकै मुद्दामा पक्राउ परेका हुन् ।
दुबै संगठनका प्रदेश कमिटीले समेत आफ्नै पार्टी निकटका उपकुलपतिविरुद्ध आन्दोलन गरेको भन्दै पक्राउ परेका नेताद्वय उपाध्याय र शाहीलाई कारबाहीका लागि सिफारिस गरेका छन् ।