महिलाको ज्यान लिएको स्कुटर प्रहरीले सुटुक्क धनीलाई बुझायो

१५ वैशाख, काठमाडौं । ललितपुरको हरिसिद्धीमा महिलालाई ठक्कर दिएर भागेका स्कुटर चालकको खोजी गर्नुपर्नेमा प्रहरीले उल्टै सवारीसाधन पनि छाडिदिएको छ ।

गत २३ माघमा बा ५० प २८४४ नम्बरको स्कुटरले ठक्कर दिँदा पैदलयात्रु दोलखा घर भइ गोदावरी–१४ बस्ने ५३ वर्षीया लक्ष्मी विक गम्भीर घाइते भएकी थिइन् । उनको उपचारका क्रममा १५ दिनपछि ग्वार्कोस्थित वीएण्डबी हस्पिटलमा मृत्यु भएको थियो ।

घटनालगत्तै नियन्त्रणमा लिइएको स्कुटर महानगरीय प्रहरी वृत्त, सातदोबाटोले सुटुक्क सवारीधनीलाई जिम्मा लगाएको हो । मृतककी छोरा विष्णु विश्वकर्माले अनलाइनखबरलाई दिएको जानकारी अनुसार प्रहरीले पीडित पक्षसँग कुरै नगरी स्कुटर बुझाएको थियो ।

दुर्घटनालगत्तै स्कुटर चालकले विकलाई हस्पिटलसम्म पुर्‍याएका थिए । तर, त्यहीँ स्कुटर छाडेर उनी फरार भए ।

यो थाहा पाएलगत्तै विश्वकर्माले विभिन्न निकायमा न्याय माग्दै उजुरी गरेका थिए । उजुरीपछि हाल सातदोबाटो प्रहरीले आफ्नो गल्ती स्वीकारेको बताउँदै विश्वकर्माले दुवै पक्षबीच छलफल गर्ने तयारी भइरहेको बताए ।

‘उहाँहरुले भोलि स्कुटर फिर्ता ल्याउने पनि भन्नु भएको छ’, उनले भने ।

डीएसपीको दाबीः मर्मत गर्न दिएका हौं

सातदोबाटो प्रहरीका प्रमुख नायब उपरीक्षक (डीएसपी) गौतम मिश्रका अनुसार लक्ष्मीलाई ठक्कर दिने स्कुटर दुर्घटना हुनुभन्दा केही दिनअघि नै चोरी भएको थियो ।

‘घटना हुनुभन्दा १०/१५ दिनअघि नै स्कुटर चोरी भएको भन्दै सवारीधनीले महानगरीय ट्राफिक प्रहरी महाशाखामा निवेदन दिनुभएको रहेछ’, मिश्रले अनलाइनखबरसँग भने, ‘हामीले नियन्त्रणमा राखेको स्कुटरको धनी खोज्दा सुमित्रादेवी नामक महिलाको नाममा त्यो दर्ता देखियो । उहाँलाई नियन्त्रणमा लिएर सोधपुछ गर्दा पहिल्यै चोरी सम्बन्धी जाहेरी दर्ता भएको खुलेको थियो ।’

प्रारम्भमा महिला ‘सामान्य घाइते’ मात्रै भएको बताउँदै मिश्रले भने, ‘पछि उहाँको निधन भयो । तर, त्यसवेलासम्म स्कुटर भक्तपुरको ठिमीबाट चोरी भएको भन्ने खुलिसकेको थियो ।’

पीडित परिवारसँग असमझदारी भएको आशय व्यक्त गर्दै डीएसपी मिश्रले स्कुटर बनाउनका लागि सुमित्रादेवीलाई दिएको पनि दाबी गरे । ‘हामीले भोलि कार्यालयमा ल्याउन भनेका छौं’, उनले थपे ।

प्रहरी मुख्यालयले थाल्यो छानबिन

सातदोबाटो प्रहरीले स्कुटर छाडेको विषयमा उजुरी परेपछि हाल प्रहरी प्रधान कार्यालयले पनि छानबिन थालेको छ । प्रहरी नायब महानिरीक्षक (डीआईजी) मनोज नेउपानेको नेतृत्वमा रहेको प्रहरी निरीक्षणालयले अनुसन्धान थालेको हो ।
प्रहरी मुख्यालयको यो शाखाले प्रहरीविरुद्ध परेको उजुरी र गुनासो उपर छानविन गर्ने गर्छ ।

केन्द्रीय प्रहरी प्रवक्ता उत्तमराज सुवेदीका अनुसार प्रारम्भिक अनुसन्धानमा चोरीको स्कुटर भएकाले ‘राखिराख्नु भन्दा सम्बन्धित धनीलाई दिनु ठिक’ हुने भएकाले बुझाइएको देखिएको छ ।

यद्यपि, यो सम्बन्धमा के हुने भन्नेबारे छानविनपछि मात्रै निक्र्यौल हुने उनले बताए । ‘यो प्रारम्भिक अनुसन्धान मात्रै हो । त्यसैले हामीले अहिल्यै यही गर्नु भनेर निर्देशन दिन मिल्दैन’, प्रहरी वरिष्ठ उपरीक्षक (एसएसपी) सुवेदीले भने ।

सक्कली दोषीको खोजी

घटना बाहिर आएपछि सातदोबाटो प्रहरीले वास्तविक दोषीको खोजीलाई तीब्र बनाएको जनाएको छ ।

स्कुटरको नम्बर प्लेट फेरेर अभियुक्तले चलाएको देखिएको बताउँदै डीएसपी मिश्रले अन्य बाटोबाट अनुसन्धान जारी राखिएको बताए ।

स्रोतका अनुसार प्रहरीले स्कुटर चोरी गर्ने व्यक्तिको फोटो सडक नजिकै रहेको सीसी टीभीको फुटेजबाट निकालेको छ । जसको आधारमा संलग्न व्यक्तिको खोजी भइरहेको बुझिएको छ ।