१० जेठ, काठमाडौं । काठमाडौंको टोखा नगरपालिका– २ दुबो गाउँ भन्ने स्थानमा एक पुरुषको शव फेला परेको छ । अन्दाजी २४–२५ वर्षको पुरुषको शव शुक्रबार बिहान फेला परेको हो ।
महानगरीय प्रहरी वृत्त महाराजगञ्जका डिएसपी फणीन्द्र प्रसाईंले शवको पहिचान नखुलेको जानकारी दिए ।
स्थानीयबासीका अनुसार ती पुरुषको शरीरमा चोटपटक देखिन्छ । त्यसैले कतिपयले हत्या भएको आशंका गरेका छन् ।
तर, डिएसपी प्रसाईंले मृत्युको कारण नखुलेको र प्रहरीले अनुसन्धान गरिरहेको बताए ।
‘सडक किनारको खोल्सा छेउँमा शव भेटिएको हो, अनुसन्धान भइरहेको छ,’ उनले भने ।
