२७ साउन, काठमाडौं । कृषि तथा पशुपक्षी विकासमन्त्री चक्रपाणि खनालले कृषकको आवश्यकता सम्बोधन हुने गरी अनुसन्धान गर्न नेपाल कृषि अनुसन्धान परिषद् (नार्क)लाई आग्रह गरेका छन् ।
काठमाडौंमा सोमबार सुरु भएको ‘एसियन कृषि सम्मेलन तथा प्रर्दशनी–२०१९’ को उद्घाटन गर्दै उनले नास्टको कामले किसानलाई छुन नसकेको भन्दै असन्तुष्टि जनाए ।
किसानको पक्षमा कृषि अनुसन्धान परिषद्ले कामै नगरेपछि त्यसको विकल्पमा किसान आवास परियोजना कार्यक्रम सुरु गर्न लागिएको मन्त्री खनालले बताए । परियोजनाले किसानका लागि आवश्यक आवाससहित प्रशिक्षण कार्यक्रम गर्ने उनको भनाइ छ ।
मन्त्री खनालले सरकारले कृषि अनुसन्धान परिषद्ले गरेका अध्ययन अनुसन्धानबाट किसानहरुले पनि सिक्न सकून भनेर परिषद्ले अंग्रेजी भाषामा तयार पारेको प्रतिवेदन केही समयअघि नेपालीमा रुपान्तरण गरेर सबै स्थानीय तहमा पठाएको पनि बताए ।
संसदको कृषि, सहकारी तथा प्राकृतिक स्रोत समितिकी सभापति पूर्णकुमारी सुवेदीले युवालाई आकर्षित गर्नेगरी कृषि क्षेत्रको विकासमा लाग्न सरकारलाई आग्रह गरिन् ।
