५ भदौ, काठमाडौं । नेपाल भ्रमणमा रहेका भारतीय विदेशमन्त्री एस जयशंकरले बिहीबार समाजवादी पार्टी नेपालका नेताहरुसँग भेटवार्ता गरेका छन् ।
बिहीबार विहान उनले उपप्रधानमन्त्री तथा पार्टीका अध्यक्ष उपेन्द्र यादव र पूर्वप्रधानमन्त्री तथा पार्टीका संघीय परिषद अध्यक्ष डा. बाबुराम भट्टराईसँग भेट गरेका हुन् ।
भेटमा द्विपक्षीय हितका विषयमा कुराकानी भएको डा. भट्टराईले ट्विटरमार्फत जनाएका छन् । ‘भारतको वर्तमान सरकारले नेपालसँग कनेक्टिभिटी र आर्थिक साझेदारी विस्तार गर्न इच्छुक रहेको जानकारी पाउँदा खुशी लागेको छ’ भट्टराईले भनेका छन् ।
बुधबार नेपाल भ्रमणमा आएका जयशंकरले बुधबार नै प्रधानमन्त्री केपी शर्मा ओलीसँग भेट गरेका थिए । बिहीबार पशुपतिनाथ मन्दिरमा पूजा गरे भने राष्ट्रपति विद्यादेवी भण्डारीसँग पनि भेट गरेका छन् ।
उनी बिहीबार नै स्वदेश फर्किने कार्यक्रम छ । नेपाल भारत संयुक्त आयोगको बैठकमा सहभागी हुन उनी नेपाल आएका हुन् । बुधबार सुरु भएको बैठक बिहीबार सकिएको छ ।