२७ असोज, काठमाडौं । सन् २०१९ को सेप्टेम्बर महिनामा १८ हजार ३ सय ५१ जना विदेशी पर्यटक गण्डकी प्रदेशको भ्रमणमा पुगेका छन् । मुख्य पर्यटकीय सिजन सुरु भएकै महिनामा ठूलो संख्यामा विदेशी पर्यटक गण्डकी प्रदेश भ्रमणमा पुगेका हुन् ।
प्रदेश सरकारले अघिल्लो महिनादेखि कास्कीस्थित पोखरा विमानस्थल कार्यालय, तनहुँको आँबुखैरेनी र स्याङ्जाको गल्याङस्थित प्रहरी चौकीबाट प्रवेश गरेका अन्तर्राष्ट्रिय पर्यटकको तथ्यांक संकलन गरी प्रशोधन गर्न थालेको हो ।
अगस्ट महिनाको तुलनामा सेप्टेम्बरमा २ हजार ४ सय ८९ जना बढी विदेशी पर्यटक यस प्रदेशको भ्रमणमा पुगेका छन् । यो संख्या अघिल्लो महिनाको तुलनामा १५.७ प्रतिशतले बढी हो । पर्यटक आगमनको विगत दुई महिनाको प्रवृत्ति हेर्दा पृथ्वी राजमार्ग भएर गण्डकी प्रदेश भित्रिने पर्यटकको हिस्सा करीव ६० प्रतिशत रहेको छ । त्यसमध्ये भारतीय पर्यटकको संख्या सबैभन्दा बढी अर्थात ३९ प्रतिशत रहेको तथ्यांकले देखाएको छ ।
