कात्तिकको ८ गते रिलिज हुन लागेको चलचित्र ‘घामड शेरे’को निर्माण टिमले शोज कम पाएको भन्दै २ साता अर्थात कात्तिक २२ लाई प्रदर्शन मिति सारेपछि केही नेपाली चलचित्रको रिलिज डेट प्रभावित भएको छ ।
यो प्रभाव विशेषगरि कात्तिकको २२ गतेबाट रिलिज हुन लागेको चलचित्र ‘सरौतो’लाई बढी परेको देखिन्छ । ‘सरौतो’ कात्तिक २९ गते रिलिज हुने चर्चा भएपनि अन्ततः यो चलचित्रलाई मंसिरको १३ गते रिलिज गर्ने तयारी गरिएको छ । कात्तिक २९ गते यसअघि नै चलचित्र ‘मिस्टर नेपाली र माछा माछा’ रिलिज हुने पक्का छ ।
अब, मंसिरको १३ गते ‘सरौतो’ रिलिज हुनेछ भने यो मितिमा रिलिज हुने भनिएको ‘प्रेम संसार’ चलचित्र मंसिरको २७ गते पुगेको छ ।
यस्तै, मंसिरको २० गते भने चलचित्र ‘दयारानी’ रिलिज हुने भएको छ । एफडी कम्पनीका प्रमुख सुशिल पोखरेलले सामाजिक संजालबाट यो कुराको जानकारी दिएका छन् । चलचित्र ‘दयारानी’ प्रदर्शन मितिका लागि भागिरहेको चलचित्र हो ।
मंसिर ६ गते रिलिज हुने भनिएको ‘च च हुई’ भने सोही मितिमा रिलिज हुनेछ ।
